पुणेः गुइलेन बॅरी सिंड्रोम या दुर्मिळ आजराच्या रुग्णसंख्येत सातत्याने वाढ होताना दिसत आहे. पुणे शहरासह पिंपरी-चिंचवड आणि ग्रामीण भागात देखील या आजाराचे रुग्ण आढळत आहेत. या आजारात आढळणारे जीवाणू आणि विषाणू दूषित पाणी यांच्यातून पसरत असल्याचे समोर आले होते. या आजाराच्या रुग्णांनी शंभरी ओलांडाली असून पुणेकरांचे टेन्शन वाढवले आहे. आत्तापर्यंत रुग्णसंख्या १११ वर पोहचली असून १६ रुग्ण हे व्हेंटिलेटरवर असल्याचे सांगण्यात आले आहे.

या आजाराचा संसर्ग झालेल्या रुग्णांची संख्या नांदेड गाव आणि नांदेड सिटीमध्ये अधिक असल्याचे दिसते. राज्याचे आरोग्यमंत्री प्रकाश आबिटकर यांनी पुण्यातील या आजाराबाबत वाढणारी रुग्णसंख्या आदी गोष्टींची माहिती घेतली. नांदेड गाव आणि नांदेड सिटी परिसरात पाणीपुरठा केल्या जाणाऱ्या विहिर या परिसरातील आहेत. या विहिरीतील दूषित पाण्यामुळेच रुग्ण वाढत असल्याची माहिती आरोग्यमंत्र्यांनी दिली.

आयुक्तांनी देखील या विहीरीमुळे साथ पसरल्याचे सांगितले आहे. यामुळे आरोग्यमंत्री प्रकाश आबिटकर यांनी वाढणाऱ्या रुग्णसंख्येची गांभीर्याने दखल घेत नागरिकांना पिण्याचे स्वच्छ पाणी मिळावे यासाठी तातडीने उपायोजना करण्याच्या सूचना दिल्या आहेत. पुण्यात या आजाराच्या रुग्णसंख्येत वाढ होत असल्याच्या पार्श्वभूमीवर आरोग्यमंत्री प्रकाश आबिटकर यांनी सोमवारी आढावा घेतला.

आरोग्यमंत्र्यांकडून परिस्थितीचा आढावा 

आरोग्यमंत्री आबिटकरांनी नांदेड परिसरातील पाणीपुरवठा करणाऱ्या विहिरीची पाहणी केली. या दुर्मिळ आजाराच्या रुग्णांवर शहरातील ससून रुग्णालय, दीनानाथ मंगेशर रुग्णालयात उपचार सुरू आहेत. या ठिकाणी जात आरोग्यमंत्र्यांनी  जीबीएस रुग्णांची भेट घेत त्यांची विचारपूस केली. यानंतर सर्व शासकीय यंत्रणांची बैठक घेऊन परिस्थितीचा आढावा घेतला.

जीबीएसचा विदर्भात प्रवेश 

गुइलेन बॅरी सिंड्रोम अर्थात जीबीएस या दुर्मिळ आजाराची रुग्णसंख्या पुण्यात वाढत असताना आता विदर्भातही या आजाराचे रुग्ण सापल्याने भीतीचे वातावरण तयार झाले आहे. जीबीएसने आता विदर्भात प्रवेश केला असून नागपूरात या आजाराचे सहा रुग्ण साडपल्याने मोठी खळबळ उडाली आहे. विदर्भात या आजाराचे रुग्ण सापडल्याने आरोग्य विभागाकडून आवश्यक ती खबरदारी घेण्याच्या सूचना देण्यात आल्या आहेत. मिळालेल्या माहितीनुसार, या आजाराचे नागपूरात एकूण सहा रुग्ण आढळून आले असून यापैकी चार रुग्ण नागपूर मेडिकल कॅाजेल तर दोन रुग्ण मेयोतम भागात आढळून आले आहेत.