Duleep Trophy 2024 (Sunil Gavaskar On Virat  & Rohit) : दुलीप ट्रॉफी 2024-25 हंगाम 5 सप्टेंबरपासून सुरू होत आहे. त्याच वेळी, या स्पर्धेचा अंतिम सामना 22 सप्टेंबर रोजी होणार आहे. दुलीप ट्रॉफी स्पर्धेत टीम इंडियातील दिग्गज आणि स्टार खेळाडू खेळताना दिसणार आहेत. मात्र, या यादीत रोहित शर्मा आणि विराट कोहली यांच्या नावाचा समावेश नाही. मात्र, आता सुनील गावस्कर यांनी यावरूनच निशाणा साधला आहे.

सुनील गावस्कर यांनी प्रश्नार्थक स्वरात अप्रत्यक्षपणे बीसीसीआयला विचारले की, “विराट कोहली आणि रोहित शर्मा दुलीप ट्रॉफीमध्ये का खेळू शकत नाहीत?” भारतीय क्रिकेटसाठी ही परिस्थिती आदर्श नाही, असं मत देखील त्यांनी मांडले आहे.

सुनील गावस्कर म्हणतात की, “हे दोन्ही दिग्गज बांगलादेशविरुद्धच्या कसोटी मालिकेत खेळणे जवळपास निश्चित आहे, असे असताना दुलीप ट्रॉफीसाठी निवडकर्त्यांनी विराट कोहली आणि रोहित शर्मा यांची निवड केलेली नाही हे समजण्या पलीकडे आहे.” कोणत्याही मोठ्या स्पर्धेपूर्वी खेळाडूचा सराव होणं हे खूप महत्वाचे असते. हे पटवून देताना ते म्हणतात की,  “सरावाशिवायही तुमचे दोन मोठे खेळाडू कसोटी मालिकेसाठी पूर्णपणे तयार होतील, असं तुम्हाला वाटतं का?  असा सवाल त्यांनी निवडकर्त्यांना केला आहे.

सुनील गावस्कर पुढे म्हणतात की, “कोणत्याही खेळातील खेळाडूचे वय 35 वर्षांच्या आसपास असेल तर तो नियमित खेळूनच स्वत:ला तंदुरुस्त ठेवू शकतो. पण तुम्ही जास्त वेळ खेळला नाही तर तुमच्या फिटनेसवर विपरीत परिणाम होतो.”

याशिवाय सुनील गावसकर यांनी जसप्रीत बुमराहबद्दल मत व्यक्त केले आहे. ते म्हणाले की, “जसप्रीत बुमराह दुलीप ट्रॉफीमध्ये खेळत नाही हे समजण्यासारखे आहे कारण वर्कलोड मॅनेजमेंट व्यतिरिक्त हा वेगवान गोलंदाज पाठीच्या दुखापतीच्या समस्यांना तोंड देत आहे.”

Duleep Trophy 2024 : दुलीप ट्रॉफीमध्ये रोहित-कोहली का खेळणार नाहीत? जय शहांनी सांगितले खरे कारण…

दरम्यान, भारत आणि बांगलादेश यांच्यात 2 कसोटी सामन्यांची मालिका खेळवली जाणार आहे. या मालिकेतील पहिली कसोटी 19 सप्टेंबरपासून खेळवली जाणार आहे. चेन्नईत दोन्ही संघ आमनेसामने येणार आहेत. त्यानंतर 27 सप्टेंबरपासून कानपूरमध्ये उभय संघांमधील दुसरी कसोटी खेळवली जाणार आहे.