Gambhir Laxman Selection : “हा खेळाडू मलाच हवा…”; ‘या’ अष्टपैलूसाठी गंभीर-लक्ष्मणमध्ये सुरु होती रस्सीखेच, अखेर BCCI ने काढला सुवर्णमध्य
Gambhir Laxman Selection : गंभीर आणि लक्ष्मणमध्ये एका स्टार अष्टपैलू खेळाडूची संघात निवड करण्यावरून मोठी रस्सीखेच झाल्याचे समोर आले आहे.
Gautam Gambhir VVS Laxman Tug Of War Over Washington Sundar Asian Games 2026 : आशियाई क्रीडा स्पर्धा २०२६ (Asian Games 2026) आणि वेस्ट इंडिजचा भारत दौरा एकाच वेळी आल्यामुळे भारतीय क्रिकेटमध्ये पुन्हा एकदा ‘स्प्लिट कोचिंग’चा प्रयोग पाहायला मिळत आहे. मुख्य प्रशिक्षक गौतम गंभीर (Gautam Gambhir) वेस्ट इंडिजविरुद्धच्या एकदिवसीय मालिकेवर लक्ष केंद्रित करत असताना, आशियाई क्रीडा स्पर्धेसाठी भारतीय टी-२० संघाच्या प्रशिक्षकपदाची धुरा व्ही.व्ही.एस. लक्ष्मण (VVS Laxman) यांच्याकडे सोपवण्यात आली आहे. मात्र, या दोन दिग्गजांमध्ये एका स्टार अष्टपैलू खेळाडूची संघात निवड करण्यावरून मोठी रस्सीखेच झाल्याचे समोर आले आहे.
दोन्ही प्रशिक्षकांना हवा होता एकच खेळाडू; वॉशिंग्टन सुंदरवरून रंगला पेच!
गंभीर आणि लक्ष्मण या दोघांनाही आपापल्या संघात हवा असलेला खेळाडू दुसरा-तिसरा कोणी नसून भारताचा आघाडीचा फिरकी अष्टपैलू वॉशिंग्टन सुंदर (Washington Sundar) होता. वेस्ट इंडिज संघात डावखुऱ्या फलंदाजांचा भरणा अधिक असल्याने गंभीर यांना एकदिवसीय मालिकेसाठी सुंदरचा संघात समावेश अनिवार्य वाटत होता. दुसरीकडे, आशियाई स्पर्धेत पुन्हा एकदा सुवर्णपदक पटकावण्यासाठी व्हीव्हीएस लक्ष्मण सुंदरला कोणत्याही परिस्थितीत सोडण्यास तयार नव्हते. त्यामुळे दोन्ही प्रशिक्षकांमध्ये एकमत होत नव्हते.
नितीश कुमार रेड्डीमुळे सुटला वाद; बीसीसीआयने काढला सुवर्णमध्य!
🚨 REPORTS 🚨
Shubman Gill and Gautam Gambhir wanted Washington Sundar in the ODI squad for the West Indies series, with several left-handers part of the visiting team. 🇮🇳
However, VVS Laxman wanted Sundar for the Asian Games and was not ready to release him for the ODI series.… pic.twitter.com/ubDHhMJ0Fy
— Sportskeeda (@Sportskeeda) September 19, 2026
हा वाद वाढल्यानंतर संघ व्यवस्थापन आणि बीसीसीआयने अखेर सुवर्णमध्य काढला. वेगवान अष्टपैलू खेळाडू नितीश कुमार रेड्डीला आशियाई क्रीडा स्पर्धेच्या टी-२० संघातून वगळून त्याला वेस्ट इंडिजविरुद्धच्या एकदिवसीय संघात समाविष्ट करण्याचा महत्त्वपूर्ण निर्णय घेण्यात आला. यामुळे गंभीर यांच्या संघाला आवश्यक असलेला अष्टपैलू पर्याय मिळाला आणि सुंदरवरील पेचावर तोडगा निघाला.
सुंदर जपानला रवाना, तर नितीश विंडीजविरुद्ध मैदानात!
या निर्णयानुसार वॉशिंग्टन सुंदर आता जपानमध्ये आशियाई क्रीडा स्पर्धेत भारताला सुवर्णपदक मिळवून देण्यासाठी फिरकीची धुरा सांभाळेल. तर देशांतर्गत क्रिकेटमध्ये हैदराबादचे प्रतिनिधित्व करणारा नितीश कुमार रेड्डी वेस्ट इंडिजविरुद्धच्या वनडे मालिकेत भारताचे प्रतिनिधित्व करेल. या समजूतदार निर्णयामुळे दोन्ही संघांचे संतुलन राखण्यात बीसीसीआयला यश आले आहे.
