Gas Shortage – शहरात गॅस सिलिंडरचा तुटवडा नसल्याचा दावा प्रशासनाकडून केला जात असला, तरी प्रत्यक्षात खानावळी व मेसचालकांना व्यावसायिक गॅस मिळत नसल्याने परिस्थिती गंभीर बनली आहे. अनेक ठिकाणी स्वयंपाकासाठी चुली पेटवाव्या लागत असून खर्च परवडत नसल्याने विद्यार्थ्यांना दिवसातून एकदाच मसालेभात देऊन जेवण भागवले जात असल्याची स्थिती निर्माण झाली आहे. त्यामुळे शहरातील विद्यार्थी व नोकरदार वर्गावर उपासमारीची वेळ येण्याची भीती व्यक्त होत आहे. पिंपरी-चिंचवडमधील अनेक मेस आणि कॅन्टीनमध्ये दररोज शेकडो विद्यार्थ्यांचे व नोकरदारांचे जेवण बनवले जाते. मात्र गेल्या काही दिवसांपासून व्यावसायिक एलपीजी सिलिंडर मिळणे कठीण झाल्याने मेसचालक अडचणीत सापडले आहेत. यापूर्वी २७०० ते ३५०० रुपयांपर्यंत वाढलेल्या दराने सिलिंडर घ्यावे लागल्याने खर्च प्रचंड वाढला आहे. आता सिलिंडर उपलब्धच नसल्याने काही मेसचालकांनी चुलीचा आधार घेतला आहे. मात्र चूल पेटवण्यासाठी लागणाऱ्या गोवऱ्या आणि सरपणाच्या दरातही मोठी वाढ झाली आहे. गोवऱ्यांची एक गोणी सुमारे सातशे ते आठशे रुपयांना मिळत आहे, तर लाकडाचा दर सुमारे दोनशे रुपये किलोपर्यंत पोहोचला आहे. त्यामुळे चुलीवर स्वयंपाक करणेही परवडेनासे झाले आहे. विद्यार्थ्यांची मेस चुलीवर काम करण्यासाठी लागणाऱ्या महिला कामगारांचीही कमतरता भासत आहे. बहुतेक महिलांना गॅसवर स्वयंपाक करण्याची सवय असल्याने चुलीवर पोळ्या किंवा भाकरी बनवणे कठीण जाते. काही मेसचालकांनी इलेक्ट्रिक शेगडीचा पर्याय वापरण्याचा प्रयत्न केला; मात्र त्यावर पोळ्या करताना तव्याचे तापमान योग्य राखणे कठीण जात असल्याने स्वयंपाकात अडचणी येत आहेत. या परिस्थितीत अनेक मेसचालकांनी मेन्यू कमी करून विद्यार्थ्यांना केवळ मसालेभात किंवा साधे जेवण देण्याचा पर्याय स्वीकारला आहे. काही ठिकाणी रात्रीचे जेवण बंद करण्यात आले आहे. परिस्थिती अशीच राहिली तर येत्या काही दिवसांत मेस पूर्णपणे बंद करण्याची वेळ येईल, अशी भीती मेसचालक व्यक्त करत आहेत. गॅस एजन्सीकडे नोंदणी करूनही सिलिंडर वेळेवर मिळत नसल्याची तक्रार नागरिक करत आहेत. एक सिलिंडर मिळाल्यानंतर पुढील सिलिंडरसाठी महिनाभर प्रतीक्षा करावी लागत असल्याचे सांगितले जात आहे. विशेषतः हातावर पोट असलेल्या नागरिकांकडे एकच सिलिंडर असल्याने त्यांची परिस्थिती अधिकच बिकट झाली आहे. चहाप्रेमींची निराशा दरम्यान, परिसरातील चहाच्या टपऱ्यांनाही गॅस टंचाईचा फटका बसला आहे. चुलीवर चहा बनवताना मर्यादा येत असल्याने साखरविरहित चहा, लेमन टी, कॉफी यांसारखे पर्याय बंद करून एकाच प्रकारचा चहा बनवला जात आहे. त्यामुळे चहाप्रेमींनाही अडचणींचा सामना करावा लागत आहे. “आमच्याकडे रोज विद्यार्थ्यांचे व नोकरदारांचे डबे असतात. गेल्या दोन दिवसांपासून चुलीवर स्वयंपाक करत आहोत; मात्र त्यावर सर्व पदार्थ बनवणे शक्य होत नाही. विद्यार्थ्यांना उपाशी ठेवता येत नाही, पण परिस्थिती अशीच राहिली तर दोन-चार दिवसांत मेस बंद ठेवावी लागेल.” – मेस चालक, चिंचवड
