Jairam Ramesh : महागाईचे आकडे धोक्याची घंटा वाजवणारे; जयराम रमेश यांची केंद्र सरकारवर टीका
कॉंग्रेसचे ज्येष्ठ नेते जयराम रमेश (Jairam Ramesh) यांनी मोदी आणि त्यांच्या सरकारवर निशाणा साधला.

Jairam Ramesh : जीवनावश्यक, घरगुती वस्तूंच्या वाढत्या किमतीवरून कॉंग्रेसने पंतप्रधान नरेंद्र मोदी आणि त्यांच्या सरकारवर जोरदार टीकास्त्र सोडले. महागाईचे सर्व आकडे धोक्याची घंटा वाजवणारे आहेत. मात्र, मोदींना केवळ राजकारणाची चिंता आहे, असे त्या पक्षाने (Jairam Ramesh) म्हटले. महागाईचे विश्लेषण करणाऱ्या सर्वेक्षणाशी संबंधित एक वृत्त प्रसिद्ध झाले. त्यानुसार, ६१ टक्के कुटूंबांच्या दरमहा खर्चात २० टक्क्यांपेक्षा अधिक वाढ झाली आहे.
त्या वृत्ताचा आधार घेऊन कॉंग्रेसचे ज्येष्ठ नेते जयराम रमेश (Jairam Ramesh) यांनी मोदी आणि त्यांच्या सरकारवर निशाणा साधला. सरकारचे आर्थिक गैरव्यवस्थापन, जनताविरोधी धोरणे आदींमुळे महागाईचा भडका उडाला आहे. त्यामुळे सामान्य जनतेचे आणि व्यावसायिकांचे हाल होत आहेत, असे त्यांनी म्हटले. एकट्या नोएडात वर्षभरात अमेरिकी टॅरिफ, महागडा कच्चा माल आणि सरकारी दुर्लक्षामुळे सुमारे २०० कपडे कारखाने बंद पडले.
त्यामधून संपूर्ण देशातील वस्त्रोद्योगाच्या दयनीय स्थितीचा अंदाज लावता येऊ शकतो. जनतेच्या जेवणाची थाळी लहान होत आहे. कारखान्यांना टाळे लागत आहेत. मात्र, सत्ताधाऱ्यांमध्ये संवेदनशीलतेचा अभाव दिसतो. जनतेच्या समस्या जाणून घेऊन दिलासा देण्यासाठी कुठले पाऊलही उचलले जात असल्याचे आढळत नाही, असा शाब्दिक हल्लाबोलही रमेश यांनी केला.
त्यामुळे महागाई, आर्थिक धोरणे, सामान्य जनता आणि व्यावसायिकांच्या समस्या आदी मुद्द्यांवरून कॉंग्रेसने (Jairam Ramesh) मोदी सरकारला घेरण्याचे सत्र कायम ठेवल्याचे दिसते.






