Garbage Issues – पिंपरीतील साधू वासवानी उद्यानाशेजारील रस्त्यावर मोठ्या प्रमाणात कचरा साचल्याने परिसरात दुर्गंधी पसरली असून डासांचा प्रादुर्भावही वाढला आहे. त्यामुळे परिसरातील नागरिकांच्या आरोग्याचा प्रश्न गंभीर बनला आहे. स्थानिक व्यावसायिक तसेच काही रहिवाशांकडून या ठिकाणी घरगुती आणि इतर प्रकारचा कचरा टाकला जात असल्याचे नागरिकांचे म्हणणे आहे.

एवढेच नव्हे तर पदपथावर अनेक दिवसांपासून दगड, माती आणि बांधकामातील राडारोडा पडून असल्याने पादचाऱ्यांची गैरसोय होत आहे. सततच्या पावसामुळे कचरा कुजून परिसरात तीव्र दुर्गंधी पसरली असून डासांचे प्रमाण वाढल्याने साथीच्या आजारांचा धोका निर्माण झाला आहे. रस्त्याच्या कडेला कचऱ्याचे ढीग साचल्यामुळे रस्ता अरुंद झाला असून सकाळी आणि सायंकाळी वाहतूक कोंडीचा सामना करावा लागत आहे.

उद्यानात फिरण्यासाठी येणारे नागरिक, ज्येष्ठ नागरिक, महिला आणि या मार्गाने ये-जा करणारे पादचारी यांना मोठा त्रास सहन करावा लागत आहे. परिसरातील नागरिकांनी पिंपरी-चिंचवड महापालिकेने तातडीने कचरा व राडारोडा हटवून परिसराची स्वच्छता करावी, नियमित कचरा उचलण्याची व्यवस्था करावी आणि या ठिकाणी कचरा टाकणाऱ्यांवर कठोर कारवाई करावी, अशी मागणी केली आहे. अन्यथा ही समस्या आणखी गंभीर होऊन सार्वजनिक आरोग्याला धोका निर्माण होण्याची भीती नागरिकांनी व्यक्त केली आहे.