Dehu Garbage Depot – देहू नगरपंचायतीच्या कचरा डेपोची सुरक्षा व्यवस्था भेदून मध्यरात्री चार ते पाच हायवा वाहनांनी हद्दीबाहेरील कचरा डेपोमध्ये टाकल्याचा धक्कादायक प्रकार समोर आला आहे. संबंधित वाहनांनी डेपोच्या तार कंपाउंडची तोडफोड करून आत प्रवेश केल्याची माहिती समोर आल्यानंतर नगरपंचायतीने तातडीने घटनास्थळी पाहणी करत सुरक्षा व्यवस्था अधिक कडक करण्यासाठी उपाययोजना सुरू केल्या आहेत.

या घटनेमुळे नगरपंचायतीच्या कचरा व्यवस्थापनासह सुरक्षा व्यवस्थेवर गंभीर प्रश्नचिन्ह निर्माण झाले असून, संपूर्ण प्रकरणाची सखोल चौकशी करण्याची मागणी नागरिकांतून होत आहे. ग्रामस्थांकडून नगरपंचायतीकडे गेल्या काही दिवसांपासून रात्रीच्या वेळी संशयास्पद वाहने डेपो परिसरात येत असल्याच्या तक्रारी सातत्याने केल्या जात होत्या. या पार्श्वभूमीवर मंगळवारी मध्यरात्री चार ते पाच हायवा वाहनांनी डेपोच्या संरक्षणासाठी उभारण्यात आलेले तार कंपाउंड तोडून आत प्रवेश केल्याची माहिती प्रत्यक्षदर्शींनी नगरपंचायतीला दिली.

या वाहनांमधून मोठ्या प्रमाणावर कचरा डेपोमध्ये टाकण्यात आल्याचा आरोप करण्यात आला आहे. देहू नगरपंचायतीचे मुख्याधिकारी चेतन कोंडे यांनी सांगितले की, डेपोमध्ये अवैधरित्या कचरा टाकण्याचे प्रकार रोखण्यासाठी सर्व आवश्यक उपाययोजना करण्यात येत आहेत. नवीन सुरक्षा व्यवस्थेमुळे संशयास्पद वाहनांची नोंद होईल आणि नियमांचे उल्लंघन करणाऱ्यांवर कठोर कारवाई करणे शक्य होईल, असेही त्यांनी सांगितले.

या घटनेमुळे नागरिकांमध्ये तीव्र संताप व्यक्त होत आहे. नगरपंचायतीच्या हद्दीबाहेरील कचरा जर देहूच्या डेपोमध्ये टाकला जात असेल, तर त्यामागे नेमके कोण आहे, संबंधित वाहनांना प्रवेश कसा मिळाला आणि सुरक्षा व्यवस्थेत नेमका कुठे हलगर्जीपणा झाला, याची निष्पक्ष चौकशी करण्याची मागणी नागरिकांनी केली आहे. कचरा व्यवस्थापन हा स्थानिक स्वराज्य संस्थांसाठी अत्यंत संवेदनशील विषय मानला जातो.

सुरक्षेत वाढ करण्याचे नियोजन
घटनेची माहिती मिळताच नगरपंचायतीच्या अधिकाऱ्यांनी घटनास्थळी धाव घेत पाहणी केली. प्राथमिक पाहणीत सुरक्षा व्यवस्थेतील त्रुटी समोर आल्याने तातडीने संरक्षण अधिक मजबूत करण्याचा निर्णय घेण्यात आला. पुन्हा अशा घटना घडू नयेत यासाठी डेपोच्या आजूबाजूला जेसीबीच्या सहाय्याने संरक्षणात्मक चर खोदण्याचे काम सुरू करण्यात आले आहे. तसेच डेपोच्या प्रवेशद्वारावर मजबूत लोखंडी फाटक उभारण्याचे काम अंतिम टप्प्यात असून, पुढील दोन दिवसांत ते कार्यान्वित होणार आहे.

संशयाच्या भोवऱ्यात आर्थिक व्यवहार?
देहू नगरपंचायतीच्या कचरा डेपोमध्ये हद्दीबाहेरील तसेच विविध कंपन्यांचा कचरा टाकण्यासाठी काही व्यक्तींमार्फत आर्थिक व्यवहार होत असल्याची चर्चा परिसरात रंगू लागली आहे. काही नगरपंचायत कर्मचारी किंवा लोकप्रतिनिधींच्या माध्यमातून हा प्रकार घडत असल्याच्या अफवा पसरल्या आहेत. मात्र या आरोपांना अद्याप कोणताही अधिकृत दुजोरा मिळालेला नाही. त्यामुळे या चर्चांमागील सत्य समोर आणण्यासाठी निष्पक्ष आणि सखोल चौकशीची मागणी नागरिकांकडून केली जात आहे.