Ganeshotsav 2026 Rules – कानठळ्या बसवणारा डीजे, थरथरणारा ‘बेस’ आणि ध्वनिप्रदूषणाच्या मर्यादेची उघडपणे होणारी पायमल्ली याला आता पिंपरी-चिंचवड पोलिसांनी लगाम घालण्याची तयारी केली आहे. दहीहंडी उत्सवातील ध्वनिप्रदूषणाच्या नियमभंगाप्रकरणी तब्बल १६ गुन्हे दाखल केल्यानंतर आता पोलिसांचे लक्ष आगामी गणेशोत्सवाकडे लागले आहे.

गणेशोत्सवात नियमांचे उल्लंघन करणाऱ्या मंडळांच्या अध्यक्ष आणि आयोजकांसह डीजे चालक व मालकांवरही थेट गुन्हे दाखल करण्याचा इशारा पोलीस उपायुक्‍त रोहिदास पवार यांनी दिला आहे. गणेशोत्सवाच्या पार्श्वभूमीवर शहरातील विविध भागांत मोठ्या प्रमाणात ध्वनिक्षेपक, डीजे आणि साउंड सिस्टीम उभारल्या जातात.

उत्सवाचा जल्लोष करण्याच्या नावाखाली अनेक ठिकाणी क्षमतेपेक्षा कितीतरी पटीने मोठ्या आवाजात संगीत वाजविले जाते. त्यामुळे परिसरातील नागरिकांना मोठा त्रास सहन करावा लागतो. विशेषतः रात्रीच्या वेळी डीजेच्या दणदणाटामुळे ज्येष्ठ नागरिक, लहान मुले आणि आजारी व्यक्ती त्रस्त होतात.

‘बेस’च्या थरथराटाने नागरिक हैराण
डीजेच्या साउंड सिस्टीममधून बाहेर पडणाऱ्या तीव्र ‘बेस’मुळे केवळ कानांवरच परिणाम होत नाही, तर घरांच्या खिडक्या-दरवाजेही थरथरतात. अनेक निवासी भागांमध्ये घरात बसलेल्या नागरिकांनाही हा आवाज सहन करावा लागतो. अभ्यास करणाऱ्या विद्यार्थ्यांपासून रुग्ण आणि ज्येष्ठ नागरिकांपर्यंत अनेकांना याचा फटका बसतो. उत्सव साजरा करण्यास कोणाचाही विरोध नाही.

मात्र, एका मंडळाच्या जल्लोषासाठी संपूर्ण परिसरातील नागरिकांना त्रास सहन करावा लागू नये, अशी अपेक्षा व्यक्त होत आहे. ढोल-ताशा, झांज, लेझीम अशा पारंपरिक वाद्यांचा नाद हा शहराच्या उत्सव संस्कृतीचा भाग आहे. मात्र, भल्या मोठ्या डीजेच्या आवाजापुढे पारंपरिक वाद्यांचा नादही झाकोळला जात असल्याची खंत नागरिक व्यक्त करीत आहेत.

दहीहंडीतील १६ गुन्ह्यांनंतर पोलिसांची नजर
दहीहंडी उत्सवादरम्यान ध्वनिप्रदूषणाच्या नियमांचे उल्लंघन करणाऱ्यांविरोधात पिंपरी-चिंचवड पोलिसांनी कारवाई करीत १६ गुन्हे दाखल केले होते. त्यामुळे यंदाच्या गणेशोत्सवातही नियमभंग करणाऱ्यांना कोणतीही सवलत दिली जाणार नसल्याचे पोलीस उपायुक्‍त रोहिदास पवार यांनी स्पष्ट केले आहे. ध्वनिप्रदूषणाची पातळी तपासण्यासाठी आवश्यकतेनुसार डेसिबल मीटरचा वापर केला जाणार आहे. शांतता क्षेत्र, रुग्णालये, शाळा आणि निवासी भागांच्या परिसरात विशेष लक्ष ठेवले जाणार आहे.

अध्यक्षांपासून डीजे मालकांपर्यंत कारवाई
ध्वनिप्रदूषण करणाऱ्या मंडळाच्या केवळ साउंड सिस्टीमवर कारवाई करून प्रकरण संपविले जाणार नाही. नियमभंग करणाऱ्या मंडळाचे अध्यक्ष, आयोजक तसेच संबंधित डीजे चालक आणि मालक यांच्यावरही कायदेशीर कारवाई केली जाईल. त्यामुळे ‘डीजे लावला आणि जबाबदारी संपली’ अशी भूमिका घेणाऱ्या मंडळांना यंदा सावध राहावे लागणार आहे.