पिंपरी  – पहाटेची वेळ. गुलाबी थंडची चाहूल लागल्‍याने शहरातील रस्त्यांवर धावणारे युवक-युवती. उद्यानांमध्ये व्यायाम करणारे नागरिक. टेकड्यांवर रनिंग करणारे तरुण. जिममध्ये घाम गाळणारी मंडळी.

पिंपरी-चिंचवडमध्ये सध्या हे चित्र सर्वत्र दिसत आहे. तरुणाईमध्ये फिटनेसची जागरूकता वाढत आहे. व्यायाम आता केवळ छंद राहिलेला नाही. तो अनेकांच्या दैनंदिन जीवनाचा भाग बनला आहे.

दुर्गादेवी टेकडी, दिघीचा डोंगर, घोराडेश्‍वर डोंगर, भक्ती-शक्ती उद्यान आणि विविध क्रीडांगणे सकाळच्या वेळी गजबजलेली दिसतात. काही जण रनिंगला प्राधान्य देतात.

काही सायकलिंग करतात. तर काही जिम आणि योगाचा आधार घेतात. महाविद्यालयीन विद्यार्थी तसेच नोकरदार वर्गही व्यायामासाठी वेळ देताना दिसतो.

पिंपरी-चिंचवडला कुस्ती, कबड्डी आणि मैदानी खेळांची परंपरा आहे. त्यात आता आधुनिक व्यायामप्रकारांची भर पडली आहे. स्ट्रेंथ ट्रेनिंग, क्रॉसफिट, पॉवर योगा आणि झुम्बाकडे तरुणाईचा कल वाढला आहे. शरीर तंदुरुस्त ठेवण्यासोबतच स्टॅमिना वाढविण्यावरही भर दिला जात आहे.

आहारात प्रथिनांना महत्त्व
व्यायामासोबत आहाराकडेही तरुणाईचे लक्ष वाढले आहे. प्रोटीनसाठी दही, पनीर, अंडी, डाळी आणि कडधान्यांचा वापर वाढला आहे. सुकामेवा आणि हिरव्या भाज्यांनाही पसंती दिली जात आहे. व्यायाम करणाऱ्या अनेक तरुणांच्या आहारात प्रथिनांचे प्रमाण वाढले आहे.

मात्र, फास्ट फूडचे आकर्षण कायम आहे. शहरातील कॅफे आणि फूड सेंटरची संख्या वाढत आहे. बर्गर, पिझ्झा आणि विविध जंक फूड सहज उपलब्ध होत आहे. ऑनलादन फूड डिलिव्हरीमुळे हे पदार्थ घरपोच मिळतात.

त्यामुळे आरोग्यदायी आहार आणि फास्ट फूड यांच्यातील संघर्ष कायम आहे. काही उद्यानांच्‍या बाहेर प्रोटीनयुक्‍त कडधान्‍यांची ’स्‍पाऊट भेळ’ही तेवढ्याच चवीने खाल्‍ली जात आहे.

सोशल मीडियामुळे फिटनेसची क्रेझ
सोशल मीडियाचाही फिटनेस ट्रेंडवर मोठा प्रभाव आहे. इन्स्टाग्रामवरील रील्स आणि यूट्यूबवरील व्हिडिओमधून विविध व्यायामांची माहिती मिळते. रनिंग चॅलेंज आणि डाएट प्लॅनही मोठ्या प्रमाणात शेअर केले जातात.
मात्र, सोशल मीडियावरील प्रत्येक माहिती योग्य असेलच असे नाही.

प्रशिक्षकांचे मार्गदर्शन न घेता अवघड व्यायाम करणे धोकादायक ठरू शकते. सप्लिमेंट्सचा वापरही तज्ज्ञांच्या सल्ल्यानेच करणे आवश्यक आहे. व्यायामासोबत पुरेशी झोप आणि संतुलित आहारालाही महत्त्व देणे गरजेचे आहे.

तरुणाईच्या फिटनेसला वेळेची साथ
महाविद्यालयीन विद्यार्थी अभ्यासासोबत व्यायामासाठी वेळ देत आहेत. नोकरदार तरुण सकाळी किंवा संध्याकाळी जिममध्ये जात आहेत. काही जण कार्यालयीन वेळेपूर्वी रनिंग करतात. काही जण सुट्टीच्या दिवशी सायकलिंगचे नियोजन करतात.

नियमित व्यायामामुळे दिवसभर उत्साह राहतो, असे अनेक तरुण सांगतात. खेळामुळे शारीरिक हालचाल वाढते. फिटनेससोबत मानसिक ताजेपणावरही भर दिला जात आहे.

झोप आणि स्क्रीन टाइमचे आव्हान
फिटनेसकडे वाढता कल असला तरी काही सवयी अडथळा ठरत आहेत. रात्री उशिरापर्यंत मोबाइलचा वापर वाढला आहे. त्यामुळे झोपेचे वेळापत्रक बिघडते. अनियमित आहार आणि बाहेरचे खाणेही अनेकांसाठी आव्हान ठरत आहे.
व्यायामासोबत योग्य झोप आणि संतुलित आहार आवश्यक आहे.

सातत्य राखणेही महत्त्वाचे आहे. केवळ काही दिवस व्यायाम करून अपेक्षित परिणाम मिळत नाही. नियमितता हाच फिटनेसचा मुख्य आधार असल्याचे तज्ज्ञांचे मत आहे.

पिंपरी-चिंचवडच्या तरुणाईची फिटनेसकडे पाहण्याची दृष्टी बदलत आहे. पारंपरिक खेळांसोबत आधुनिक व्यायामप्रकार स्वीकारले जात आहेत. रनिंगपासून योगापर्यंत आणि जिमपासून सायकलिंगपर्यंत अनेक पर्याय उपलब्ध आहेत. मात्र, फिटनेस टिकवताना आहार, झोप आणि व्यायाम यांचा समतोल राखणे तितकेच महत्त्वाचे ठरणार आहे.

Pimpri-Chinchwad : रातराणी अपुरी, बस थांब्यांवर करावी लागते प्रतीक्षा; पिंपरी-चिंचवडमध्ये रात्रीच्या प्रवासाचा प्रश्न गंभीर,