पुणे – शहरातील राजा रावबहादूर मिल्स येथील “किकी” नावाच्या पबमध्ये आयोजित फ्रेशर्स पार्टीला महाराष्ट्र नवनिर्माण विद्यार्थी सेनेने (मनविसे) थेट धडक देत ती पार्टी थांबवली. एमआयटी – वर्ल्ड पिस युनिव्हर्सिटी, सिम्बायोसिस आणि व्हीव्हीआयटी या महाविद्यालयांतील शेकडो तरुण-तरुणी या पार्टीस उपस्थित होते. या ठिकाणी मोठ्या प्रमाणात अल्पवयीन मुलांना मद्यविक्री होत असल्याचे उघड झाले. पार्टीदरम्यान कोणत्याही प्रकारचे ओळखपत्र तपासले जात नसल्याचे आणि प्रवेशाचे नोंदवही देखील ठेवले जात नसल्याचे आढळून आले. ही माहिती मिळताच मनविसे पदाधिकाऱ्यांनी राज्य उत्पादन शुल्क प्रशासनाशी संपर्क साधला. प्रशासनाच्या अधिकाऱ्यांसमवेत थेट पबमध्ये धाड टाकत चालू पार्टी बंद करण्यात आली. रात्री उशिरापर्यंत (२ वाजेपर्यंत) उत्पादन शुल्क विभागाकडून कारवाई सुरू होती.
