Gyanesh Kumar – विरोधी पक्षांच्या खासदारांनी मुख्य निवडणूक आयुक्त ज्ञानेश कुमार (Gyanesh Kumar ) यांना त्यांच्या पदावरून हटवण्यासाठी संसदेच्या दोन्ही सभागृहात औपचारिक नोटिसा सादर केल्या आहेत. भारतीय संसदेच्या इतिहासात मुख्य निवडणूक आयुक्तांविरुद्ध अशा प्रकारची नोटीस देण्याची ही पहिलीच वेळ आहे. या नोटिशीवर लोकसभेतील १३० आणि राज्यसभेतील ६३ खासदारांनी स्वाक्षऱ्या केल्या आहेत. इंडिया आघाडीतील सर्व घटक पक्षांसह आम आदमी पक्षानेही या प्रस्तावाला पाठिंबा दिला आहे. तृणमूल काँग्रेसने या मोहिमेचे नेतृत्व केले असून काही अपक्ष खासदारांनीही यावर स्वाक्षरी केली आहे. Gyanesh Kumar सीईसी ज्ञानेश कुमार (Gyanesh Kumar ) यांच्यावर एकूण सात गंभीर आरोप करण्यात आले आहेत. यामध्ये पदाचा गैरवापर, पक्षपाती वर्तन, निवडणूक फसवणुकीच्या तपासात अडथळा आणणे आणि मतदारांना त्यांच्या हक्कापासून वंचित ठेवणे यांसारख्या मुद्द्यांचा समावेश आहे. मुख्य निवडणूक आयुक्तांना हटवण्याची प्रक्रिया ही सर्वोच्च न्यायालयाच्या न्यायाधीशांच्या महाभियोग प्रक्रियेसारखीच असते. संविधानाच्या अनुच्छेद ३२४(५) नुसार, हा प्रस्ताव मंजूर होण्यासाठी संसदेच्या दोन्ही सभागृहात विशेष बहुमताची (दोन-तृतीयांश बहुमत) आवश्यकता असते. विरोधी पक्षांनी असा आरोप केला आहे की, सध्या सुरू असलेली एसआयआर (SRI)प्रक्रिया सत्ताधारी पक्षाला फायदेशीर ठरेल अशा पद्धतीने राबवली जात आहे.
