Food Price Hike – शहरात व्यावसायिक गॅस सिलिंडर टंचाईचा परिणाम आता हॉटेल आणि रेस्टॉरंट व्यवसायावर स्पष्टपणे दिसू लागला आहे. गॅसचा पुरवठा विस्कळीत झाल्यामुळे अनेक हॉटेलांनी मेन्यूमध्ये मोठ्या प्रमाणात कपात केली असून काही ठिकाणी खाद्यपदार्थांच्या किमतीही वाढवल्या आहेत. परिणामी ग्राहकांमध्ये नाराजीचे वातावरण निर्माण झाले आहे. व्यावसायिक गॅस सिलिंडर वेळेवर उपलब्ध होत नसल्याने अनेक हॉटेल व्यावसायिकांना स्वयंपाकासाठी पर्यायी व्यवस्था करावी लागत आहे. काही ठिकाणी लाकडी भट्टी, इंडक्शन किंवा इतर पर्यायी साधनांचा वापर करून स्वयंपाक सुरू ठेवला जात असला तरी उत्पादन खर्च वाढल्याने मेन्यूतील अनेक पदार्थ बंद करावे लागल्याचे व्यावसायिकांनी सांगितले. तर काही ठिकाणी खानावळींमध्ये देखील जेवणाचेही दर वाढले आहेत. यामुळे नोकरी-शिक्षणासाठी शहरात वास्तव्यास असलेल्या बॅचलर तरुणाईच्या खिशाला कात्री लागत आहे. मोजकेचे पदार्थ गॅस टंचाईमुळे अनेक हॉटेलमध्ये समोसा, कचोरी, दोसा, सांबारवडा यांसारख्या पदार्थांच्या किमती वाढल्या आहेत. काही ठिकाणी तवा रोटी, डोसा, भाजलेले पापड यांसारखे पदार्थ मेन्यूमधून काढून टाकण्यात आले आहेत. अनेक रेस्टॉरंटमध्ये मेन्यूमधील पदार्थांची संख्या मोठ्या प्रमाणात कमी करण्यात आली आहे. व्यावसायिक सिलिंडर टंचाई यामुळे आता नाष्ट्यासाठी मोजकेच पदार्थ उपलब्ध असल्याचे दिसून येत आहे. ज्या पदार्थांना बनविण्यासाठी अधिक गॅसची गरज भासते ते पदार्थ बनविणे व्यावसायिकांनी बंद केले आहे. तर चपाती, भाकरीच्या दरांमध्ये देखील काही ठिकाणी वाढ झाल्याचे दिसून येत आहे. पर्यायी इंधनाचा वापर व्यावसायिक सिलिंडरचा पुरवठा अनियमित झाल्याने काही हॉटेल व्यावसायिक लाकूड, इलेक्ट्रिक शेगडी, इंडक्शन किंवा डिझेल भट्टीचा वापर करत आहेत. मात्र या पर्यायांमुळे खर्च वाढत असल्याने खाद्यपदार्थांच्या किमती वाढवण्याची वेळ येत असल्याचे सांगितले जात आहे. हॉटेल कामगारांवर परिणाम हॉटेल व्यवसायावर परिणाम झाल्याने अनेक ठिकाणी ग्राहकांची संख्या कमी झाली आहे. परिणामी हॉटेलमध्ये काम करणाऱ्या कर्मचाऱ्यांवरही त्याचा परिणाम होत असून त्यांच्या रोजगाराबाबतही चिंता व्यक्त केली जात आहे. खासगी वसतिगृहातील स्वयंपाकावरही परिणाम दरम्यान, शहरातील काही खासगी वसतिगृहांमध्ये जेवण बनविण्यासाठी लाकडी चुलीचा वापर सुरू करण्यात आला आहे. गॅस उपलब्ध नसल्यामुळे मेन्यूमध्येही बदल करण्यात येत असून काही पदार्थ कमी करण्यात आले आहेत. तर काही ठिकाणी केवळ मसाले भातावर बोळवण केली जात आहे. हॉटेल व्यावसायिकांनी गॅस पुरवठा सुरळीत करण्याची मागणी करत पर्यायी व्यवस्था उपलब्ध करून देण्याची मागणी प्रशासनाकडे केली आहे.
