Manoj Jarange Patil: राज्यात पुन्हा एकदा मराठा आरक्षणाचा मुद्दा चांगलाचा तापला आहे. मराठा समाजाला आरक्षण मिळावे यासाठी मराठा समाजाचे मनोज जरांगे पाटील यांनी पुन्हा एकदा आंदोलनाचे हत्यार उपसलं आहे. जरांगे हे अंतरवाली सराटी या त्यांच्या गावाहून मुंबईच्या दिशेने रवाना झाले आहेत.

२९ अॅागस्टला मुंबईत आझाद मैदानावर त्यांना एक दिवस आंदोलन करण्याची परवानगी देण्यात आली आहे. त्यांच्यासोबत मोठ्या संख्येने समाज बांधव मुंबईच्या दिशेने रवाना झाले आहेत. अशातच आता भाजपकडून जरांगे पाटील मुंबईत दाखल होण्यापूर्वी मोठी बॅनरबाजी करण्यात आली आहे.

भाजपने या बॅनरबाजीमधून मनोज जरांगे पाटील यांच्या मोर्चाला प्रत्युत्तर दिलं आहे. जरांगे पाटील हे मुख्यमंत्री देवेंद्र फडणवीस यांच्यावर टीका करणारी विधानं करत आहेत, तर दुसरीकडे उपमुख्यमंत्री एकनाथ शिंदे यांचं कौतुक करत आहेत. आता मुख्यमंत्री देवेंद्र फडणवीसांच्या समर्थनार्थ मुंबईत भाजपची बॅनरबाजी केली आहे.

पहिल्यांदा आरक्षण देणारे देवेंद्र फडणवीस

या बॅनरमधून इतिहास हा कर्तृत्ववाला लक्षात ठेवतो’, असा मायना लिहिण्यात आला आहे, तर मराठा समाजाला पहिल्यांदा आरक्षण देणारे देवेंद्र फडणवीस, असा उल्लेखही या बॅनरमधून करण्यात आला आहे. या बॅनरमध्ये पुढं असंही म्हटलं आहे की उच्च न्यायालयात आरक्षण टिकवणारे देवेंद्र फडणवीस. ही बॅनरबाजी जरांगे पाटील मुंबईच्या दिशेने कूच केल्यानंतर करण्यात आल्याने चर्चांना उधान आलं आहे. याशिवाय या बॅनवर भाजप आमदार प्रविण दरेकर, प्रसाद लाड, निरंजन डावखरे आणि नरेंद्र पाटील यांची नावही दिसत आहेत.

पुणे जिल्ह्यातून जाणार 

मराठा समाजाला आरक्षण मिळावे यासाठी अंतरवाली सराटी या गावातून मनोज जरांगे पाटील हे २७ अॅागस्टला मुंबईच्या दिशेने रवाना झाले आहेत. त्यांनी यासंबंधी पत्रकार परिषद घेत कशा पद्धतीने ते मुंबईच्या दिशेने जाणार आहे याबाबत माहिती दिली. आता ते आज पुणे जिल्ह्यात दाखल होणार असून, जुन्नर तालुक्यातील शिवनेरी किल्ल्यावर छत्रपती शिवाजी महाराज यांच्या पुतळ्याला अभिवादन करून पुढे मार्गस्थ होणार आहेत.

काय बोलणार?

ओबीसीतूनच मराठा आरक्षण द्या, या मागणीसाठी मनोज जरांगे पाटील आग्रही आहेत. ते २९ अॅागस्टला आझाद मैदानावर आंदोलन करणार आहेत. यामुळे मनोज जरांगे आंदोलनस्थळी नेमकं काय बोलणार याकडे सर्वांचे लक्ष लागलेलं आहे.

हेही वाचा : Monalisa: कुंभमेळ्यातील व्हायरल गर्ल मोनालिसा करणार चित्रपटातून पदार्पण