First Day of School – तब्बल दीड महिन्याच्या उन्हाळी सुट्टीनंतर सोमवारी शाळांमध्ये पहिली घंटा वाजली. विद्यार्थ्यांचा किलबिलाटाने शाळांच्या निर्जीव इमारतींमध्ये सळसळते चैतन्य निर्माण झाले. कोठे औक्षण करुन फुलांची उधळून करत, कोठे गुलाब पुष्पांनी, कोठे ढोल-ताशांच्या गजरात तर चॉकलेट आदी भेट वस्तुंचे वाटप अशा अभिनव उपक्रमांनी विद्यार्थ्यांचे जल्लोषात स्वागत करण्यात आले. शालेय शिक्षण विभागाने यंदा शाळा प्रवेशोत्सव अभिनव उपक्रम राबवला.

अधिकारी, लोकप्रतिनिधी, विविध संघटनांचे पदाधिकाऱ्यांनी शाळांना भेटी देवून विद्यार्थ्यांचे स्वागत केले. विद्यार्थ्यांना मोफत शालेय साहित्यांचे वाटपही केले. शाळांमध्ये मुख्याध्यापक, शिक्षक, कर्मचारी, संस्थेचे पदाधिकारी आदी सर्वच विद्यार्थ्यांच्या स्वागतासाठी उपस्थित होते. शाळांमध्ये आकर्षक सजावटी करण्यात आल्या होत्या. रांगोळ्या, फुलांच्या पायघड्याही घालण्यात आल्या होत्या. सेल्फी पॉईंटवरती विद्यार्थ्यांनी सेल्फीचा आनंद लुटला.

जुने मित्र -मैत्रिणी भेटणे, गप्पा मारणे, एकत्र जेवणाचा डब्बा खाणे अशा उत्साही वातावरणात शाळेला सुरुवात झाली. नव्याने शाळा प्रवेश करणाऱ्या चिमुकल्यांना रडणेही आवरत नसल्याचे दृश्‍य काही ठिकाणी पाहायला मिळाले. चिमुकल्यांना शांत करण्यासाठी व त्यांना शाळेची आवड निर्माण व्हावी यासाठी ताईंना मोठी कसरत करावी लागली. पहिलाच दिवस असल्याने विद्यार्थ्यांना शाळेत सोडण्यासाठी व परत घरी आणण्यासाठी पालकांचीही मोठ्या प्रमाणात गर्दी झाली होती. स्कूल बस, रिक्षा, व्हॅनचीही गर्दी झाल्याने अनेक शाळांच्या आवारात वाहतूक कोंडी झाली.

महाराष्ट्र गर्ल्स एज्युकेशन सोसायटीच्या ज्योत्स्ना सुरेश डोळ शिशु मंदिर शाळेत विविध चित्रांनी सजावट केली. फुलांच्या पाकळ्या उधळून मुलींचे स्वागत केले. रानडे बालक मंदिरात कर्षक रांगोळ्यांनी परिसर सजवत विद्यार्थ्यांवर पुष्पवृष्टी केली. नवीन मराठी शाळेत विविध समाजसुधारकांच्या वेशभूषेत विद्यार्थ्यांनी नवागतांचे स्वागत केले. मा. स. गोळवलकर गुरुजी विद्यालयात विद्यार्थ्यांना सूर्यफुलांच्या बियांचे वाटप झाले. तसेच योग सप्ताहालाही प्रारंभ झाला.

डी.ई.एस. मुरलीधर लोहिया पूर्व प्राथमिक शाळेत अग्निहोत्र आणि गुरुकुल परंपरेची ओळख करून देणाऱ्या कार्यक्रमांचे आयोजन केले होते. एन.ई.एम.एस. शाळेत ढोल-ताशांच्या गजरात विद्यार्थ्यांचे स्वागत करण्यात आले. टिळक रोडवरील न्यू इंग्लिश स्कूलमध्ये विद्यार्थी आणि पालकांसाठी परिचय कार्यक्रम आयोजित केला होता. विमलाबाई गरवारे प्रशालेत विद्यार्थ्यांचे औक्षण करून तसेच भेटवस्तू देऊन स्वागत केले. यावेळी प्रशालेचे मुख्याध्यापक रोहिदास भारमळ, उपमुख्याध्यापिका सुनिता गायकवाड, पर्यवेक्षिका जयश्री शिंदे आदी उपस्थित होते.

सेमी इंग्रजी माध्यमाच्या महेश विद्यालयात नवागतांचे स्वागत आगळ्या उपक्रमाने झाले. इंधन बचतीचा संदेश देण्यासाठी बैलगाडी, घोडागाडी, सायकल, पायी चालणारे पालक यात सहभागी झाले होते . म. ए. सो. पूर्व प्राथमिक शाळेत जंगल सफारीच्या थीममुळे चिमुकल्यांच्या चेहऱ्यावर उत्साह दिसत होता. मोठ्या गटाची काही मुलं प्राण्यांच्या वेशात आली होती, त्यांनी मुलांचे स्वागत केले.