उरुळी कांचन, (पुणे) : विजयादशमीच्या पवित्र सणाच्या निमित्ताने सीमोल्लंघन करत असताना भरदिवसा हवेत गोळीबार करण्याचा धक्कादायक प्रकार पुणे जिल्ह्यातील उरुळी कांचन पोलीस ठाण्याच्या हद्दीत घडला आहे. कोरेगाव मुळ (ता. हवेली) ग्रामपंचायत क्षेत्रात दोन पिस्तुलांचे पूजन करून हा प्रकार घडवून आणला. या घटनेचा व्हिडिओ सध्या सोशल मीडियावर व्हायरल झाल्याने परिसरातील नागरिकांमध्ये भीतीचे वातावरण पसरले आहे.

या घटनेला दोन दिवस लोटूनही पोलिसांकडे अधिकृत तक्रार न दाखल झाल्याने नागरिकांमध्ये संतापाची लाट उसळली असून, “महाराष्ट्राचा बिहार झाला का?” असा जोरदार सवाल सोशल मीडियावर उमटत आहे. वाढती गुन्हेगारी आणि पोलिसांच्या निष्क्रियतेमुळे राज्यातील कायदा-सुव्यवस्था धोक्यात येत असल्याची भीती व्यक्त होत आहे.

सणाच्या नावाखाली गुन्हेगारीचा खेळ

विजयादशमीला सीमोल्लंघन ही परंपरा काही भागांत प्रतीकात्मकपणे साजरी केली जाते, ज्यात प्राचीन काळातील सीमा ओलांडण्याच्या स्मृतींना उजागर केले जाते. मात्र, कोरेगाव मुळ गावात ही परंपरा गुन्हेगारीला आळा घालण्याच्या नावाखाली हिंसेत बदलली. व्हायरल व्हिडिओनुसार, दुपारी सुमारे २ वाजता एका व्यक्तीने दोन पिस्तुलांचे पूजन करून हवेत गोळीबार केला. गर्दीच्या ठिकाणी हा प्रकार घडला आहे. या घटनेमुळे गावात तणावाचे वातावरण निर्माण झाले असून, स्थानिक शेतकरी आणि व्यावसायिकांमध्ये भीती पसरली आहे.