हंताकोई परंपरेतील बहुतेक कलाकृती या कलेपेक्षा हंतकोई लोकांचा जीवनातील घडामोडींवर असणारी श्रद्धा आणि विश्वास प्रकट करतात. निकोबार द्वीप समूहावर राहणाऱ्या हंताकोई जमातीच्या लोकांना जहाजातील होकायंत्र, खिशात ठेवण्याचे घड्याळ, दुर्बिण, पाकिटे या गोष्टी नव्या आणि वेगळ्या वाटतात. त्यामुळे प्रत्येकवेळी केवळ सुंदर वस्तू, कलाकृती किंवा प्रतिकांनाच ओळख मिळाली पाहिजे असे नव्हे तर विचित्र आणि मनात भिती निर्माण करणाऱ्या कलाकृतीनांही प्रसिद्धी मिळते. निकोबार द्वीप समूहातील लोकांची कुलदेवता म्हणजेच भितीदायक राक्षस किंवा सैतान म्हणून ओळखल्या जाणाऱ्या प्रसिद्ध आकृत्यांविषयी असेच सांगता येईल. हंताकोई परंपरेतून तयार झालेल्या या आकृत्या कलेपेक्षा त्या लोकांच्या मनातील श्रद्धा आणि विश्वास प्रदर्शित करतात.

त्या भितीदायक आहेत पण स्थानिक लोकांसाठी त्या पूजनीय आहेत. निकोबार द्वीप समूहातील मूलनिवासी निकोबारी समुदायाचे लोक या बेटांवरील किनारपट्टीच्या गावांमध्ये राहतात आणि जगण्यासाठी वेळोवेळी शिकार आणि नैसर्गिक साधनसंपत्तीचा मर्यादित वापर करतात. त्यांच्या अध्यात्मिक ब्रह्मांडात आकर्षण आणि प्रतिकर्षणाचा नियम आहे. त्यातून त्यांना धार्मिक जीवनात नव्हे तर रोजच्या दैनंदिन जीवनातही दिशादर्शन होत असते. जेव्हा ते शिकारी मोहिमा आणि शोधयात्रेसाठी निघताना नौकांना चांगल्या रंगाने रंगवतात त्यावर सुंदर नक्षी काढतात. त्यामागील कारण म्हणजे समुद्रातील चांगल्या शक्ती नौकेच्या दिशेने आकर्षित व्हाव्यात व वाईट शक्ती दूर राहाव्यात. हंताकोई लोक भितीदायक सैतानाची निर्मिती हीच श्रद्धा बाळगून करतात. त्यांच्यातील मेनलुआना नावाने ओळखले जाणारे अध्यात्मिक मार्गदर्शक त्यांना वाईट शक्तींशी लढण्यासाठी भितीदायक सैतानाची निर्मिती करतात.

या आकृत्या दोन प्रकारच्या असतात. मानवी आकृत्यांना करेउ म्हणून ओळखले जाते आणि दुसऱ्या पशुरूपी आकृत्या. त्यांच्या ब्रह्मांड विज्ञानानुसार करेउ आकृत्या या त्यांच्या इविका या परोपकारी पूर्वाजांचे रुप असते. त्यांना सर्वसाधारणपणे विपोट या वाईट आत्म्यांना पळवून लावण्यासाठी भितीदायक आणि सक्रीय चेहऱ्याच्या बनवले जाते.

हंताकोई ही एक मोठी परंपरा आहे. ती म्यानमार, मलेशिया आणि श्रीलंकेच्या व्यापाऱ्यांशी असणाऱ्या शतकानुशतकांच्या संबंधातून विकसित झालेली आहे. ही परंपरा तयार होण्यात ख्रिस्ती मिशनरी आणि बुडालेल्या जहाजांच्या अवशेषांनी देखील महत्त्वाची भूमिका बजावलेली आहे. या आकृत्यांच्या माध्यमातून निकोबारी लोकांचा अन्य जगाशी व्यापार आणि देवाणघेवाणीच्या पद्धतींची एक वेगळी झलक पाहायला मिळते. काही आकृत्यांच्या डोक्यावर मलायन हेल्मेट असल्याचे दिसून आले आहे. ते व्यक्तीच्या हनुवटीवर बांधले जाते. त्यातून निकोबारी संस्कृतीवर मलय प्रायद्वीपावरील भौतिकवादी संस्कृतींचा कसा प्रभाव पडला आहे हे दिसून येते.

भारतीय उपखंडात युरोपीय लोकांच्या आगमनानंतर हंतकोई संस्कृतीतील आकृत्यांमध्ये यरोपिय वेशभूषादेखील दिसू लागली. त्यामध्ये टोपी, कोट, पँट अशा गोष्टी आहेत. काही आकृत्यांच्या चेहऱ्यावर पांढरा रंग फासण्यात आला आहे. जेणेकरून बेटांवरील गोऱ्या युरोपिय लोकांबद्दल संशय व्यक्त केला जात आहे. काही वर्षे या बेटांचा ताबा जपान्यांकडे होता. त्या काळातील करेउ आकृत्यांमध्ये हेल्मेट घातलेल्या जपानी सैनिकांना दाखवण्यात आले आहे.

त्यातून बेटांवरील मूल निवासी नागरिकांना कोणत्या गोष्टी वेगळ्या आणि विचित्र वाटत होत्या ते लक्षात येते. जसे की, होकायंत्र, खिशात ठेवण्याची घड्याळे, दुर्बिण, पाकिटे इत्यादी. म्हणजेच हंताकोई आकृत्यांमध्ये केवळ सांस्कृतिक वारसा नाही तर विदेशी वर्चस्व, घुसखोरी, मूल निवासी लोकांमधील विदेशींची अनावश्यक उपस्थिती, जबरदस्ती यांचाही समावेश आहे.