Woman Police Beaten – शिरूर तालुक्यातील जातेगाव बुद्रुक येथे प्रेमविवाह केलेल्या एका महिला पोलीस कर्मचार्‍याला जातीवाचक शिवीगाळ करून मारहाण केल्याप्रकरणी शिक्रापूर पोलिसांनी चौघांविरुद्ध अनुसूचित जाती-जमाती अत्याचार प्रतिबंधक कायद्यासह विविध कलमान्वये गुन्हा दाखल केला आहे. संबंधित महिला पोलीस शिपाई या प्रेमविवाहानंतर जातेगाव बुद्रुक येथील सासरी आल्या असता त्यांचे पती, दीर आणि जाऊ यांनी त्यांना घरात येण्यास विरोध केला.

यावेळी तू आमच्या घरी यायचे नाही, असे म्हणत पतीने त्यांची पिशवी घराबाहेर फेकून दिल्याचा आरोप फिर्यादीत करण्यात आला आहे. यानंतर चौघांनी मिळून महिलेला जातीवाचक शिवीगाळ, दमदाटी व मारहाण केली. तसेच, आम्ही यशचे दुसरे लग्न करणार आहोत, तुझी गरज नाही, अशी धमकी दिल्याचेही फिर्यादीत नमूद करण्यात आले आहे. दरम्यान, पती यश पवार यांनी लाकडी बॅटने मारहाण करून जखमी केल्याचा आरोपही करण्यात आला आहे.

या प्रकरणी पीडित महिला पोलीस कर्मचार्‍यांच्या फिर्यादीवरून यश दिनकर पवार, अजय दिनकर पवार, कविता अजय पवार आणि पूनम संतोष पोहरे (सर्व रा. जातेगाव बुद्रुक, ता. शिरूर, जि. पुणे) यांच्याविरुद्ध शिक्रापूर पोलीस ठाण्यात गुन्हा दाखल करण्यात आला आहे. या प्रकरणाचा पुढील तपास शिरूर उपविभागीय पोलीस अधिकारी रवींद्र भोसले यांच्या मार्गदर्शनाखाली सुरू आहे.