FDA Milk Norms – दूध खरेदीसाठी अन्न व औषध प्रशासनाने (एफडीए) लागू केलेल्या नव्या फॅट आणि एसएनएफ निकषांमुळे राज्यातील लाखो दूध उत्पादक शेतकऱ्यांमध्ये चिंतेचे वातावरण निर्माण झाले आहे. नव्या नियमांनुसार कोणतीही दूध संकलन संस्था किंवा डेअरी ३.२ टक्के फॅट आणि ८.३ टक्के एसएनएफपेक्षा कमी दर्जाचे दूध खरेदी करू शकणार नाही. त्यामुळे निकष पूर्ण न करणारे दूध स्वीकारण्यास डेअरींना मर्यादा येणार असल्याची चर्चा सुरू आहे.

विशेषतः गाईच्या दुधामध्ये अनेक वेळा फॅट आणि एसएनएफचे प्रमाण हव्या त्या पातळीपर्यंत पोहोचत नसल्याचे सांगितले जाते. त्यामुळे ग्रामीण, डोंगराळ आणि आदिवासी भागातील लहान दूध उत्पादक शेतकऱ्यांचे दूध नाकारले जाण्याची भीती व्यक्त केली जात आहे. परिणामी शेतकऱ्यांचे आर्थिक नुकसान होण्याची शक्यता असून, दैनंदिन उत्पन्नावरही त्याचा परिणाम होऊ शकतो.दुसरीकडे, ग्राहकांना दर्जेदार व सुरक्षित दूध उपलब्ध व्हावे, या उद्देशाने हे निकष लागू करण्यात आल्याचे सांगितले जात आहे.

शेतकऱ्यांना मार्गदर्शन आवश्यक
मात्र, नव्या नियमांची अंमलबजावणी करताना शेतकऱ्यांना आवश्यक मार्गदर्शन, जनावरांच्या पोषणासाठी सहाय्य आणि संक्रमण कालावधी देण्याची मागणी दुग्ध व्यवसायाशी संबंधित घटकांकडून होत आहे. या निर्णयाचा राज्यातील दुग्ध व्यवसायावर नेमका काय परिणाम होणार, याकडे आता शेतकरी आणि दूध संघांचे लक्ष लागले आहे.