FDA Maharashtra – राज्यातील अन्न, औषधे आणि सौंदर्यप्रसाधनांच्या गुणवत्तेवर नियंत्रण ठेवण्यासाठी अन्न व औषध प्रशासनाने (एफडीए) नमुना तपासणीची मोहीम तीव्र केली आहे. जून ते ऑगस्ट २०२६ या तीन महिन्यांत राज्यभरातून ३७ हजार ६०४ नमुने तपासणीसाठी घेण्यात आले. त्यापैकी ३२ हजार ६०४ नमुन्यांची तपासणी पूर्ण झाली असून, तपासलेल्या नमुन्यांपैकी १५ हजार २६८ नमुने अप्रमाणित दर्जाचे आढळले आहेत.

पुण्यातील आरोग्य विभागाच्या मान्यताप्राप्त प्रयोगशाळेतही अन्न नमुन्यांची तपासणी केली जात आहे. या कालावधीत ३४ हजार ५८४ अन्न नमुने तपासणीसाठी उपलब्ध झाले. त्यापैकी ३० हजार ४९२ नमुन्यांची तपासणी पूर्ण झाली. यामध्ये १५ हजार ३३२ नमुने प्रमाणित, तर **१५ हजार १६० नमुने अप्रमाणित ठरले.

औषधे व सौंदर्यप्रसाधनांच्या ३ हजार २० नमुन्यांपैकी २ हजार ११२ नमुन्यांची तपासणी झाली. यात आठ बनावट, ९३ अप्रमाणित आणि सात चुकीचे लेबल असलेले नमुने आढळले. गेल्या वर्षाच्या तुलनेत नमुना तपासणीला मोठी गती मिळाली आहे. २०२५-२६ मध्ये दरमहा सरासरी ३ हजार ९६७ नमुने घेण्यात आले होते. यंदा ही संख्या १२ हजार ५३४ झाली आहे.

निकृष्ट, बनावट, भेसळयुक्त किंवा चुकीच्या लेबलचे नमुने आढळल्यास संबंधित उत्पादक, वितरक आणि विक्रेत्यांविरुद्ध कायद्यानुसार कारवाई केली जात आहे. नागरिकांच्या आरोग्याच्या संरक्षणासाठी जोखिमाधारित तपासणी, बाजार सर्वेक्षण, तक्रार चौकशी आणि आवश्यकतेनुसार फौजदारी कारवाईही केली जात आहे, असे अन्न व औषध प्रशासनाचे आयुक्त तुकाराम मुंढे यांनी सांगितले.