FDA Action Pune – अन्न व औषध प्रशासनाने सुरक्षित अन्न, सुरक्षित औषध, सुरक्षित महाराष्ट्र मोहिमेअंतर्गत पुणे विभागात १ ते ३ जुलैदरम्यान ७० हॉटेल व रेस्टॉरंटची तपासणी केली. तपासणीत अस्वच्छता, अन्न सुरक्षा व मानके कायद्याचे उल्लंघन केले आहे, तसेच काही ठिकाणी मुदतबाह्य अन्नसाठा आढळून आल्याने सात आस्थापनांचे परवाने तात्काळ निलंबित करण्यात आले. अन्न सुरक्षा आयुक्त तुकाराम मुंढे यांच्या निर्देशानुसार ही तपासणी मोहीम सुरू आहे.

हॉटेल व्यावसायिकांनी स्वच्छता, अन्न सुरक्षा नियम आणि मोफत शुद्ध पिण्याच्या पाण्याची सुविधा उपलब्ध करून देण्याचे आवाहन करण्यात आले आहे. त्‍यानुसार निलंबित आस्थापनांमध्ये हॉटेल ग्रँड पुरंदर सिंहगड रोड, क्राउन बेकर्स सिंहगड रोड, मे. ॲग्रोटीस केटरिंग प्रा. लि. ता. आंबेगाव, जि. पुणे, बरकत बिर्याणी हाऊस वाघोली पुणे, रॉयल बिर्याणी हाऊस वाघोली पुणे आणि नॅशनल ३६० बावधन यांचा समावेश आहे.

अन्नाच्या दर्जाबाबत तक्रारींसाठी नागरिकांनी १८००२२२३६५ या टोल-फ्री क्रमांकावर संपर्क साधावा, असेही प्रशासनाने म्हटले आहे. पिंपळे गुरव येथील मे. देवांश मिल्क ऍन्ड मिल्क प्रॉडक्टस या आस्थापनेच्या तपासणीवेळी २३० किलो ग्रॅम रुपये ९० हजार ५०० किमतीचा साठा विनालेबल व भेसळीच्या संशयावरून जप्त करून आस्थापनेचा अन्न परवाना निलंबित करण्यात आला आहे.

अन्न सुरक्षा अधिकारी शि. ग. घाटोळ यांनी सा. सु. पटवर्धन, अक्षय शेळके यांच्या पथकाने विश्वजीत शिंदे, सहायक आयुक्त (अन्न) यांच्या मार्गदर्शनाखाली कारवाई केली. विनापरवाना अथवा नियमबाह्य पद्धतीने अन्न व्यवसाय करणाऱ्या, तसेच दर्जाहीन, भेसळयुक्त अन्नपदार्थांचे उत्पादन, प्रक्रिया व विक्री करणाऱ्या आस्थापनांविरुद्ध यापुढेही कठोर कारवाई केली जाईल, अशी माहिती सहआयुक्त (अन्न) दि. वा. भोगावडे यांनी दिली.