प्रभात वृत्तसेवा
पिंपरी – मुंबई–पुणे द्रुतगती मार्गावर भरधाव वेगातील कारने ट्रकला पाठीमागून जोरदार धडक दिली. या अपघातात कारमधील ज्‍येष्‍ठ नागरिकाचा मृत्‍यू झाला. ही घटना शनिवारी सायकाळी सव्‍वापाच वाजताच्‍या सुमारास गहुंजे येथे घडली.द्वारकाप्रसाद लाडुराम शर्मा (वय ७८) असे अपघातात मृत्‍यूमुखी पडलेल्‍या ज्‍येष्‍ठ नागरिकाचे नाव आहे. याबाबत त्‍यांचा मुलगा कारचालक सोमनाथ द्वारकाप्रसाद शर्मा (वय ४९, रा. एल.आय.सी. कॉलनी, सिंधुनगर, प्राधिकरण, निगडी, पुणे) याच्‍या विरोधात गुन्‍हा दाखल केला आहे.

अख्तर सराबर खान (वय ३६, रा. विजय गायकर चाळ, गोळवली, कल्याण, मूळ रा. फतेउल्लापुर, गाझीपूर, उत्तरप्रदेश) असे ट्रक चालकाचे नाव असून त्‍यांनी शनिवारी याबाबत शिरगाव पोलीस ठाण्‍यात फिर्याद दिली आहे. पोलिसांनी दिलेल्‍या माहितीनुसार, फिर्यादी ट्रक (एन.एल.०१ एई ३९५५) चालवत होते. ते शनिवारी सायंकाळी सव्‍वापाच वाजताच्‍या सुमारास गहुंजे येथे आले असता आरोपीने त्याची कार (एमएच १४ एचडी ६७८१) ही वेगाने व निष्काळजीपणे चालवून ट्रकला पाठीमागून धडक दिली. या अपघातात आरोपी यांचे वडिल द्वारकाप्रसाद शर्मा यांचा मृत्यू झाला. शिरगाव पोलीस याबाबत अधिक तपास करीत आहेत.