Accident News – छत्रपती संभाजीनगरमध्ये भीषण अपघाताची दुर्घटना घडली आहे. या अपघातात दीड महिन्‍यांच्‍या चिमुकल्‍यास एकाच कुटुंबातील चौघांचा मृत्यू झाला आहे. हे कुटुंब शुक्रवारी अमरावतीहून पुण्याच्या दिशेने जात असताना वाळूजपासून तीन किलोमीटर पुढे लिंबेजळगाव परिसरातील टोलनाक्याजवळ हा अपघात घडला. मिळालेल्या माहितीनुसार, दहा वर्षांनंतर झालेल्या बाळाचे बारसे आटोपून हे कुटुंब पुण्याला जात होते.

पोलिसांनी दिलेल्या माहितीनुसार, शुक्रवारी अजय देसरकर हे अभियंते अमरावतीहून कुटुंबासह त्यांच्या चारचाकी वाहनाने पुण्याला जात होते. यावेळी वाळूजकडून तीन किलोमीटर पुढे गेल्यानंतर विरुद्ध दिशेने येणाऱ्या स्कॉर्पिओच्या चालकाचे वाहनावरील नियंत्रण सुटले आणि त्यांची गाडी थेट दुभाजकांना ओलांडून देसरकर यांच्या कारला जाऊन धडकली.

यात कारमधील चालक, दोन महिला व दोन लहान मुले गंभीर जखमी होऊन अडकून पडली. नागरिकांनी मदतीसाठी धाव घेत वाळूज पोलिसांना माहिती दिली. पोलिसांनी जखमींना प्राथमिक उपचारासाठी खासगी रुग्णालयात दाखल केले.

मृणालिनी, आशालता, दुर्गा सागर गिते व एका चिमुकल्याचा उपचारादरम्यान मृत्यू झाला, तर अजय, शुभांगिनी हे दोघे गंभीर जखमी असून, त्यांच्यावर उपचार सुरू आहेत. याप्रकरणी स्कॉर्पिओ चालकासह दोघांना अटक करण्यात आली आहे. ही गाडी वाळूज येथील एका १९ वर्षीय तरुणांची असून त्याने ही गाडी त्याच्या मित्राला चालवायला दिली होती.

यावेळी दोघेही मद्यधुंद अवस्थेत असल्याचे हा अपघात घडल्याची माहिती वाळूज पोलीस ठाण्याचे वरिष्ठ पोलीस निरीक्षक राजेंद्र सहाने यांनी दिली आहे. तसेच त्यांच्याविरोधात सदोष मनुष्यवधाचा गुन्हा दाखल करण्यात आला असून त्यांच्या रक्ताचे नमुने घेण्यात आल्याचही त्यांनी सांगितले.