जांबूत : शिरूर तालुक्यातील आंबेगाव विधानसभेला जोडलेल्या ४२ गावांच्या ऊस उत्पादक शेतकऱ्यांच्या शिष्टमंडळाने सोमवार (दि. २४) रोजी भीमाशंकर सहकारी साखर कारखाना कार्यालयात कारखान्याचे अध्यक्ष बाळासाहेब बेंडे, उपाध्यक्ष प्रदीप वळसे पाटील व संचालक मंडळाची भेट घेतली. यावेळी अधिकृत सभासदत्वाची मागणी करत भीमाशंकर कारखान्याच्या कार्यक्षेत्रातील शिरूर तालुक्यातील ४२ गावांचा यामध्ये समावेश करावा व अनामत शेअर्स भरलेल्या शेतकऱ्यांना कायम अधिकृत सभासद करावे तसेच दोन्ही विषय कारखान्याच्या वार्षिक सर्वसाधारण सभेच्या विषयपत्रिकेवर घ्यावेत या मागणीचे निवेदन यावेळी देण्यात आले.

भीमाशंकर सहकारी साखर कारखाना स्थापनेपासून ४२ गावांतील शेतकऱ्यांनी शेअर्स खरेदी करून नेहमीच अधिक प्रमाणात ऊस भीमाशंकर कारखान्याला दिला आहे. परंतु अजूनही अधिकृत सभासदत्व मिळालेले नाही. याआधीच्या काळात घोडगंगा सहकारी कारखाना सुरु असतानाही या शेतकऱ्यांनी उसाला अधिकचा बाजारभाव मिळत असल्याने भीमाशंकर कारखान्यालाच प्राधान्य असल्याने शेतकऱ्यांचे मागणीचा विचार करता संबंधित संचालक मंडळाने तांत्रिक अडथळे दूर करून य शेतकऱ्यांना न्याय द्यावा. असे मत पिंपरखेडचे माजी उपसरपंच नरेश ढोमे यांनी मांडले.

या शिष्टमंडळात जांबूत विकास सोसायटीचे माजी अध्यक्ष बाळासाहेब पठारे, शेतकरी नेते माउली ढोमे, अविनाश पोकळे, नितीन थोरात, म्हातारबा शेलार, रविंद्र म्हस्के, शशांक गीते, दत्ता दुडे, आबा वागदरे, बाळासाहेब सालकर, विकास वरे, रमेश वरे आदी उपस्थित होते.