Manoj Jarange : मराठा आरक्षणाच्या लढ्यासाठी पुन्हा एकदा मैदानात उतरलेले नेते मनोज जरांगे पाटील यांनी मुख्यमंत्री देवेंद्र फडणवीस यांच्यावर गंभीर आरोप करत 29 ऑगस्ट 2025 रोजी मुंबईत मराठा समाजाच्या विशाल मोर्चाची घोषणा केली आहे. साताऱ्याच्या फलटण तालुक्यात मराठा समाजाच्या बैठकीत बोलताना जरांगे यांनी फडणवीसांवर मराठा-ओबीसी समाजात दंगल घडवण्याचा कट रचत असल्याचा थेट आरोप केला.

ते म्हणाले, “मराठा आणि ओबीसीत दंगल घडली, तर त्याला मुख्यमंत्री देवेंद्र फडणवीसच जबाबदार असतील. याचा फटका केवळ राज्य सरकारलाच नाही, तर केंद्रातील भाजप सरकारलाही बसेल.”

जरांगेंचा मुंबई मोर्चाचा प्लॅन

मराठा समाजाला ओबीसी प्रवर्गातून आरक्षण मिळावे, या मागणीसाठी जरांगे यांनी 29 ऑगस्टला मुंबईत ‘चलो मुंबई’चा नारा दिला आहे. पश्चिम महाराष्ट्रातील कोल्हापूर, सांगली, सातारा येथील दौऱ्यात मराठा समाजाकडून मिळालेल्या प्रचंड पाठिंब्यामुळे जरांगे उत्साहित आहेत.

ते म्हणाले, “पश्चिम महाराष्ट्रातून मोठ्या संख्येने मराठा बांधव मुंबईला येतील. मराठवाडा आणि विदर्भातूनही तितक्याच ताकदीने समाज येईल. 29 ऑगस्टला आम्ही आरक्षणाचा तुकडा पाडणार, आणि तो ओबीसीतूनच मिळवणार.” यासोबतच, त्यांनी अंतरवाली सराटी येथील लाठीचार्जसाठी फडणवीसांना थेट जबाबदार धरले, ज्यामुळे मराठा आंदोलकांवर पोलिसांनी कारवाई केली होती.

मुख्यमंत्री फडणवीसांवर टीकास्त्र

मनोज जरांगे यांनी फडणवीसांवर मराठा आणि ओबीसी समाजात फूट पाडण्याचा प्रयत्न करत असल्याचा आरोप केला. ते म्हणाले, “फडणवीस म्हणतात, ते ओबीसींसाठी लढणार. याचा अर्थ मराठ्यांसाठी लढणार नाहीत का? संवैधानिक पदावर बसलेल्या व्यक्तीने सर्व समाजांसाठी काम करायला हवे. पण फडणवीस मराठा नेत्यांना घोटाळ्यांमध्ये अडकवून त्यांची प्रतिमा डागाळत आहेत. मराठा समाजाने आता जागे होऊन पावर ॲक्शन कमिटी स्थापन करावी, नाहीतर फडणवीस सर्वांना संपवतील.”

मराठा-ओबीसी दंगलीचा इशारा

जरांगे यांनी फडणवीसांवर मराठा-ओबीसी समाजात दंगल घडवण्याचा कट रचत असल्याचा गंभीर आरोप केला. ते म्हणाले, “ओबीसींना गोव्यात बोलावून मराठ्यांविरोधात कान भरले जात आहेत. पण मराठा आणि ओबीसी समाज एकत्र येऊन फडणवीसांना अद्दल घडवतील. दंगल घडली, तर त्याची जबाबदारी फडणवीसांवर असेल.” यासोबतच, त्यांनी सरकारने सगेसोयरे अध्यादेश, मराठा-कुणबी एकच कायदा आणि मराठा आंदोलकांवरील गुन्हे मागे घेण्याच्या मागण्या पूर्ण न केल्याचा मुद्दा उपस्थित केला.

मराठा समाजाचा पाठिंबा

जरांगे यांच्या पश्चिम महाराष्ट्रातील दौऱ्यात मराठा समाजाकडून प्रचंड प्रतिसाद मिळत आहे. ते म्हणाले, “58 लाख कुणबी नोंदी असूनही सरकार मराठ्यांना फसवत आहे. आता मुंबईत जाऊन आमरण उपोषण करणार, माघार नाही.” मराठवाडा आणि विदर्भातूनही मोठ्या संख्येने मराठा बांधव मुंबई मोर्चात सहभागी होण्याची शक्यता आहे.

फडणवीसांचा मराठा-ओबीसी संतुलनाचा प्रयत्न

दुसरीकडे, फडणवीस यांनी मराठा आणि ओबीसी समाजाला संतुलित ठेवण्याचा प्रयत्न केला आहे. त्यांच्या मंत्रिमंडळात 16 मराठा आणि 10 ओबीसी मंत्र्यांचा समावेश आहे, ज्यामुळे दोन्ही समाजांना समान प्रतिनिधित्व देण्याचा प्रयत्न दिसतो. तसेच, राष्ट्रीय ओबीसी महासंघाच्या अधिवेशनात फडणवीसांनी ओबीसी समाजाच्या हक्कांसाठी सरकार कटिबद्ध असल्याचे सांगितले.