Extortion Case On Police – गुन्हा दाखल करण्याची धमकी देत तीन तरुणांकडून दोन हजार रुपये घेणाऱ्या फरासखाना पोलीस ठाण्यातील दोन पोलिसांविरुद्ध खंडणीचा गुन्हा दाखल केला आहे. एका २४ वर्षीय तरुणाने फरासखाना पोलीस ठाण्यात दिलेल्या फिर्यादीनुसार, तक्रादार तरुण हडपसरला राहायला असून तो हाॅटेलमध्ये कामाला आहे. २९ जुलै रोजी त्याने दोन मित्रांसोबत शनिवारवाडा पाहिला. रात्री साडेअकराला बुधवार पेठेतून निघाले तिघे निघाले असता तेथे नाकाबंद होती.

पोलीस शिपाई विवेक पाटील आणि राहुल दाभाडे हे दुचाकीवरुन तेथे आले आणि तरुणांना अडवले. ओळखपत्राची मागणी केली असता तिघांनी मोबाइलमधील आधारकार्ड दाखविले. पोलिसांनी तुमच्याविरुद्ध गुन्हा दाखल होईल. न्यायालयात न्यावे लागेल, असे सांगितले. यामुळे तिघेही घाबरले. पाटील, दाभाडे यांनी कारवाई टाळण्यासाठी तिघांकडून प्रत्येकी पाच हजार असे १५ हजार रुपये मागितले.

एकाने एवढे पैसे नाहीत, मित्राकडून दोन हजार ऑनलाइन मागवून घेतो, असे सांगितले. त्यानंतर त्याला दुचाकीवरुन बुधवार पेठेत नेऊन एका ओळखीच्या महिलेच्या मोबाइलवर ऑनलाइन दोन हजार पाठविण्यास सांगितले. तरुणाने हाॅटेलच्या मालकाशी संपर्क साधून अडचणीत असल्याचे सांगत दोन हजार पाठविण्यास सांगितले. पैसे जमा झाल्यावर हा प्रकार कोणाला सांगायचा नाही, अशी धमकी पोलिसांनी दिली.

यानंतर परत जाताना तिघांनी कॅबचालकाला या घटनेची माहिती दिली. कॅबचालकाने याची चित्रफीत समाज माध्यमात प्रसारित केली. याची माहिती वरिष्ठांना मिळाल्यावर केलेल्या चौकशीत पोलिसांनी धमकावून पैेसे घेतल्याचे आढळले. त्यानंतर दोघांविरूद्ध खंडणीचा गुन्हा दाखल झाला.