टोरंटो  – अलीकडेच कॅनडामध्ये भारतीय वंशाच्या लोकांना खंडणीचे धमक्याचे फोन येत असल्याची घटना समोर आली आहे. आता बातमी आली आहे की कॅनडाच्या पोलिसांनी राष्ट्रीय स्तरावर एक पथक तयार केले आहे. हे पथक अशा सर्व प्रकरणांची चौकशी करेल.

या घटनांचा तपास करण्यासाठी रॉयल कॅनेडियन माउंटेड पोलिसांचे राष्ट्रीय समन्वय आणि समर्थन पथक ब्रिटिश कोलंबिया, ओंटारियो आणि अल्बर्टा राज्यांमधील पोलिसांसोबत काम करत आहे. या तीन राज्यांमध्येच भारतीय आणि दक्षिण आशियाई वंशाच्या नेत्यांना खंडणीच्या धमक्या मिळाल्याच्या बातम्या आल्या आहेत.

हे तपास पथक धमकीच्या खंडणी कॉलमागील हेतू तपासत आहे. हे प्रकरण संघटित गुन्हेगारीशी संबंधित मानले जात आहे. गेल्या काही महिन्यांत, दक्षिण आशियाई वंशाच्या लोकांना, विशेषत: भारतीय वंशाच्या लोकांना कॅनडात खंडणीचे धमकीचे फोन आले होते.

याप्रकरणी अनेक तक्रारी दाखल झाल्या. कॅनडात खलिस्तानी दहशतवादी हरदीपसिंग निज्जरच्या हत्येनंतर कॅनडात भारतीय वंशाच्या लोकांवर विशेषतः हिंदूंवर हल्ले वाढले आहेत. अनेक हिंदू मंदिरांनाही लक्ष्य करण्यात आले आहे.

भारतीय वंशाच्या काही लोकांच्या घरांवर गोळीबाराच्या घटनाही घडल्या. गुन्हेगारांनी फोन करून सुरक्षेच्या बदल्यात लोकांकडून २ दशलक्ष डॉलर्सची खंडणी मागितली होती.

गेल्या वर्षी नोव्हेंबरमध्ये, कॅनडाच्या पोलिसांनी दावा केला होता की या घटनांमागे एक भारतीय गुन्हेगारी टोळी आहे, जी कॅनडातील दक्षिण आशियाई वंशाच्या लोकांना लक्ष्य करत आहे.

गेल्या वर्षी डिसेंबरमध्ये कॅनडातील वैदिक हिंदू कल्चरल सोसायटीच्या अध्यक्षांच्या मुलाच्या घरावर गोळीबार झाल्याची घटना घडली होती. याप्रकरणी कॅनडाच्या पोलिसांनी दोघांना अटक केली होती. मात्र, चौकशीनंतर दोघांनाही सोडून देण्यात आले.