लखनऊ: स्वयंपाक करत असताना अचानक सिलेंडरचा स्फोट झाल्याने दोन घरं अक्षरशः जमीनदोस्त झाली आहेत. ही धक्कादायक घटना उत्तरप्रदेशमध्ये घडली आहे. या घटनेत दोन्ही घरातील पंधरा लोक यामध्ये अडकले होते. यातील आठ जणांचा मृत्यू झाला आहे. तर, सात जखमींना उपचारासाठी रुग्णालयात दाखल करण्यात आलं आहे.

उत्तर प्रदेशच्या गोंडा  जिल्ह्यातील वजीरगंज ठाण्याच्या परिसरातील टिकरी गावात घडली आहे. जखमींवर सध्या जिल्हा रुग्णालयात उपचार सुरू आहेत. घटनास्थली अजूनही एक लहान मुलगा अडकल्याची भीती व्यक्त केली जात आहे. पोलीस तात्काळ घटनास्थळी दाखल झाले असून रेस्क्यू ऑपरेशन सुरू आहे.

आतापर्यंत 2 महिला, 2 पुरुष आणि 4 लहान मुलांचे मृतदेह बाहेर काढण्यात आले आहेत. तर, या घटनेत जखमी झालेल्या सात जणांना रुग्णालयात दाखल करण्यात आलं आहे. टिकरी गावातील नुरूल हसन यांच्या घरामध्ये अचानक स्फोट झाला. यात शेजारी असलेलं घरही जमीनदोस्त झालं. घटनेत दोन्ही घरं जमीनदोस्त झाली.

या घटनेची माहिती मिळताच आयजी देवीपाटन रेंज, पोलीस अधीक्षक, एएसपी आणि अनेक ठाण्यांमधील फोर्स घटनास्थली दाखल झाली. यानंतर घटनास्थळावरुन आठ लोकांचे मृतदेह बाहेर काढण्यात आले. एसपी आणि उपजिल्हाधिकाऱ्यांच्या मार्गदर्शनाखाली मदत आणि बचावकार्य सुरू आहे. अद्याप  स्फोटाचे नेमकं कारण समोर आलेलं नाही. मात्र, स्फोटाचा स्तर पाहाता काहीही अंदाज लावणे कठीण आहे. फॉरेंसिक टीमदेखील घटनास्थळी दाखल झाली आहे.