नवी दिल्ली : बिहारच्या विधानसभा निवडणुकीकडे प्रतिष्ठेची निवडणूक म्हणून पाहण्यात येत होते. मात्र त्यात पुन्हा एकदा एनडीएने बाजी मारत सत्तेच्या चाव्या आपल्याकडेच ठेवल्या आहेत. दरम्यान, बिहारमध्ये काँग्रेसचा पराभव झाला आहे. त्यातच आता “लोकांना आमच्याकडून अपेक्षा उरलेल्या नाहीत. काँग्रेस नेतृत्वाला बिहारचा पराभव सामान्य वाटत असावा”, असे म्हणत काँग्रेसचे ज्येष्ठ नेते कपिल सिब्बल यांनी पक्षालाच घरचा अहेर दिला आहे.

काही दिवसांपूर्वीच कपिल सिब्बल यांच्यासह काँग्रेसच्या २२ ज्येष्ठ नेत्यांनी सोनिया गांधी यांना पत्र लिहून नाराजी व्यक्त केली होती. एका इंग्रजी वर्तमानपत्राला दिलेल्या मुलाखतीत कपिल सिब्बल यांनी हा आहेर दिला आहे. बिहारच नाही तर देशात ज्या ठिकाणी पोटनिवडणुका झाल्या तेथील जनतेने काँग्रेसला नाकारले आहे. गुजरातच्या पोटनिवडणुकीत काँग्रेसला एकाही जागेवर विजय मिळालेला नाही. तीन ठिकाणी उमेदवारांचे डिपॉझिटही जप्त झाले आहे. लोकसभा निवडणुकीत गुजरातमध्येही हेच घडले होते. तर उत्तर प्रदेशच्या पोटनिवडणुकीतही काही ठिकाणी काँग्रेसच्या उमेदवारांना दोन टक्के मते मिळाली आहेत. त्यामुळे जनमताचा संदेश स्पष्ट आहे की त्यांनी आपल्याला नाकारले आहे असेही कपिल सिब्बल म्हणाले आहेत.

“बिहारमधील पराभवाचे काँग्रेसच्या पक्ष नेतृत्वाला फारसे गांभीर्य नाही. या पराभवानंतर पक्ष नेतृत्वाकडून कोणत्याही प्रकारचा संवाद साधण्यात आल्याचे माझ्या कानावर आलेले नाही. कदाचित सगळे काही सुरळीत आहे आणि बिहारचा पराभव ही सामान्य बाब आहे असे पक्ष नेतृत्वाला वाटत असावे” अशी टीकाही सिब्बल यांनी केली.

आपल्या पक्षाची मोठी घसरण होते आहे ही बाबत काँग्रेसने सर्वात आधी स्वीकारायला हवी. आपले कुठे चुकते आहे? हे काँग्रेसला चांगलेच ठाऊक आहे. मात्र त्याबाबत कोणीही काहीही बोलायला तयार नाही. हे असेच सुरु राहिले तर भविष्यात काँग्रेसचा आलेख आणखी खाली घसरत राहिल अशीही भीती कपिल सिब्बल यांनी व्यक्त केली.