England World Record : इंग्लंडचा साऊथम्पॅटनमध्ये नवा वर्ल्ड रेकॉर्ड! भारताविरुद्ध ‘हा’ खास पराक्रम करणारा ठरला पहिलाच संघ
England World Record : टी-२० आंतरराष्ट्रीय क्रिकेटच्या इतिहासात भारताविरुद्ध (Team India) कोणत्याही संघाने उभारलेली ही सर्वात मोठी धावसंख्या ठरली आहे.
IND vs ENG 5th T20I Southampton Score 257 Highest Score Against India T20I History : भारत आणि इंग्लंड यांच्यातील ५ टी-२० सामन्यांच्या मालिकेतील पाचवा आणि अंतिम सामना साऊथम्पॅटनच्या मैदानावर खेळवला जात आहे. या सामन्यात भारताचा कर्णधार श्रेयस अय्यरने टॉस जिंकून प्रथम गोलंदाजी करण्याचा घेतलेला निर्णय पूर्णपणे चुकीचा ठरला. प्रथम फलंदाजी करताना यजमान इंग्लंडने निर्धारित २० षटकांत ३ बाद २५७ धावांचा हिमालयासारखा डोंगर उभा करत नवा इतिहास रचला आहे.
टी-२० आंतरराष्ट्रीय क्रिकेटच्या इतिहासात भारताविरुद्ध (Team India) कोणत्याही संघाने उभारलेली ही सर्वात मोठी धावसंख्या ठरली आहे. यासह भारताविरुद्ध टी-२० मध्ये २५० हून अधिक धावा कुटणारा इंग्लंड हा जगातील पहिलाच संघ बनला आहे. ज्यामध्ये बटलर-ब्रूकच्या २३३ धावांची भागीदारीने महत्त्वाची भूमिका बजावली.
इंग्लंडने मोडला स्वतःचाच मोठा रेकॉर्ड –
Jos Buttler and Harry Brook stitched a record partnership against India, wreaking havoc in Southampton 🥶
📝: https://t.co/N7ah8WNSUQ pic.twitter.com/3BRhZX5RPV
— ICC (@ICC) July 11, 2026
विशेष म्हणजे, इंग्लंडने या डावात स्वतःचाच रेकॉर्ड मोडला. याच वर्षी (२०२६ मध्ये) मुंबईच्या वानखेडे स्टेडियमवर झालेल्या आयसीसी टी-२० वर्ल्ड कपच्या सेमीफायनलमध्ये इंग्लंडने भारताच्या आव्हानाचा पाठलाग करताना २४६ धावा कुटल्या होत्या, जो तोपर्यंतचा भारताविरुद्धचा सर्वोच्च स्कोअर होता. आता साऊथम्पॅटनमध्ये २५७ धावा करत इंग्लंडने नवा विक्रम प्रस्थापित केला.
टी-२० आंतरराष्ट्रीय क्रिकेटमध्ये भारताविरुद्धचे सर्वात मोठे स्कोअर्स:
- २५७/३ – इंग्लंड, साऊथम्पॅटन (२०२६)
- २४६/७ – इंग्लंड, वानखेडे (२०२६)
- २४५/६ – वेस्ट इंडिज, लॉडरहिल (२०१६)
- २२७/३ – दक्षिण आफ्रिका, इंदूर (२०२२)
बटलर आणि हॅरी ब्रुकचे वादळ; गोलंदाजांची काढली पिसं –
इंग्लंडची सुरुवात केवळ ८ धावांवर फिल सॉल्टच्या विकेटने खराब झाली होती. मात्र, त्यानंतर सलामीवीर जॉस बटलर आणि कर्णधार हॅरी ब्रुक यांनी मैदानावर अक्षरशः धुमाकूळ घातला. हॅरी ब्रुकने अवघ्या ४५ चेंडूंत ४ चौकार आणि ८ षटकारांच्या मदतीने ९५ धावांची धडाकेबाज खेळी केली. तर दुसऱ्या बाजूने जॉस बटलरने ६४ चेंडूंत १२ चौकार आणि ८ षटकारांसह १३१ धावांची विनाशकारी शतकी खेळी केली.
