मंचर : गणेशोत्सवाच्या उत्साहात सोमवारी (दि. १४) रात्री आकाशात घडलेल्या चंद्र-शुक्राच्या मनोहारी युतीने नागरिकांचे लक्ष वेधून घेतले. रात्री सात ते साडेसातच्या सुमारास निरभ्र आकाशात चंद्राच्या अगदी जवळ शुक्र ग्रह तेजस्वी स्वरूपात दिसत होता. हा नजारा पाहण्यासाठी अनेकांनी घराच्या गच्चीवर, गॅलरीत तसेच अंगणात येऊन आकाशाकडे पाहत या सुंदर क्षणाचे छायाचित्रण केले.

खगोलशास्त्रीय भाषेत या घटनेला ‘चंद्र-शुक्र युती’ असे म्हटले जाते. प्रत्यक्षात चंद्र आणि शुक्र यांच्यामध्ये प्रचंड अंतर असूनही पृथ्वीवरून पाहताना हे दोन्ही खगोलीय पिंड एकमेकांच्या अगदी जवळ असल्याचा भास होतो. गणेश चतुर्थीच्या दिवशीच हा योग आल्याने त्याला विशेष महत्त्व प्राप्त झाले.

निरभ्र आकाशामुळे चंद्र आणि शुक्राचे तेज अधिक स्पष्टपणे दिसत होते. शहरातील प्रकाशझोतापासून दूर असलेल्या भागांत हा नजारा अधिक उठून दिसत होता. त्यामुळे गणेशोत्सवाच्या आनंदात आकाशातील या अनोख्या दृश्याचीही भर पडली.

चंद्र आणि शुक्र प्रत्यक्षात एकमेकांपासून खूप दूर आहेत. मात्र पृथ्वीवरून त्यांच्या आकाशातील स्थितीमुळे ते जवळ दिसतात. गणेशोत्सवाच्या दिवशी घडलेली ही खगोलीय घटना नागरिकांसाठी निसर्ग आणि विज्ञानाचा सुंदर अनुभव ठरली.
– प्रमोद दांगट, विज्ञान प्रेमी, निरगुडसर.