Satara: ‘गणपती बाप्पा मोरया… पुढच्या वर्षी लवकर या!’च्या जयघोषात सातारकरांनी शनिवारी घरगुती पाच दिवसांच्या गणरायांना भावपूर्ण निरोप दिला. तीन दिवसांच्या गौराईंचे हळदी- कुंकू झाल्यानंतर त्यांचेही विसर्जन करण्यात आले. बाप्पांच्या आगमनावेळी ज्या उत्साहाने आणि धावपळीने सुवासिनींनी स्वागत केले, त्याच भावनेने गौराईंना निरोप देताना अनेकांच्या डोळ्यांच्या कडा ओलावल्या. मात्र, भक्तिभावाच्या या वातावरणात सातारा नगरपालिकेच्या विसर्जन व्यवस्थेतील निर्माल्य व्यवस्थापनाचा गोंधळ प्रकर्षाने जाणवला.

सातारा शहरातील सात सार्वजनिक गणेश मंडळांच्या पाच दिवसांच्या गणरायांचे विसर्जन शनिवारी करण्यात आले. शहरातील मोती तळे, बुधवार नाका विसर्जन तळे, दगडी शाळा येथील कृत्रिम तळे, भवानी तलाव आणि आयुर्वेदिक गार्डन परिसरातील कृत्रिम तळे यासह विविध ठिकाणी पालिकेने विसर्जन कुंडांची व्यवस्था केली होती. मुख्याधिकारी विनोद जळक यांनी या व्यवस्थेची पाहणी केली. विसर्जनासाठी पालिका आणि पोलिसांचा बंदोबस्त ठेवण्यात आला होता. पालिकेचे २५ कर्मचारी विविध ठिकाणी तैनात होते. पोलीस अधीक्षक निखिल पिंगळे, सातारा शहर पोलीस ठाण्याचे निरीक्षक सचिन म्हेत्रे तसेच शाहूपुरी पोलीस ठाण्याचे निरीक्षक संग्राम शेवाळे यांनी आपापल्या कार्यक्षेत्रातील बंदोबस्ताची पाहणी केली.

निर्माल्याची व्यवस्था नाहीच…घंटागाडीत टाकण्याच सल्ला

पालिकेने शहरात मोठ्या प्रमाणावर विसर्जन कुंडांची व्यवस्था केल्याचे सांगितले. मात्र, गणेशमूर्ती विसर्जनासाठी पाण्याने भरलेले कुंड तयार केले. पण त्यातून बाहेर पडणारे निर्माल्य कुठे टाकायचे, याचे नियोजन कुठे आहे? असा सवाल गणेशभक्तांकडून उपस्थित करण्यात आला. पालिकेने निर्माल्य संकलनासाठी सुमारे ५० ठिकाणी व्यवस्था केल्याचा दावा केला असला, तरी प्रत्यक्ष विसर्जनस्थळी काही ठिकाणी भक्तांची तारांबळ उडाली. जलकुंड आणि निर्माल्य कुंड यामध्ये स्पष्ट फरक न केल्याने संभ्रम निर्माण झाला. काही ठिकाणी निर्माल्य पिशवीत भरून घंटागाडीत टाकण्याचा सल्ला पालिका कर्मचाऱ्यांकडून दिला जात असल्याचे चित्र दिसले. त्यामुळे दरवर्षी विसर्जनाबरोबर स्वतंत्र निर्माल्य व्यवस्थापन करणाऱ्या पालिकेच्या यंत्रणेने यंदा नेमके नियोजन काय केले? हा प्रश्न उपस्थित झाला.गणेशोत्सवाच्या काळात निर्माल्य थेट जलस्रोतांमध्ये जाणार नाही, यासाठी मोठमोठ्या घोषणा केल्या जातात. मात्र, प्रत्यक्ष विसर्जनाच्या वेळी निर्माल्याची स्वतंत्र आणि तातडीची व्यवस्था नसेल, तर या घोषणांचा उपयोग काय, असा सवालही नागरिकांकडून करण्यात आला.

आता सातारकरांची गर्दी होणार देखावे पाहण्यासाठी

पाच दिवसांच्या गणरायांना निरोप झाल्यानंतर आता शहरातील सार्वजनिक गणेश मंडळांचे आकर्षक देखावे पाहण्यासाठी सातारकरांची गर्दी होणार आहे. मोती चौक, राजवाडा परिसर, बुधवार नाका आणि भवानी तलाव परिसरात बॅरिकेडिंग तसेच रस्त्यांच्या डांबरीकरणाची कामे अंतिम टप्प्यात आली आहेत. गर्दीवर नियंत्रण ठेवण्यासाठी सातारा नगरपालिकेने शहरातील विविध भागांत विशेषतः विसर्जन मार्गावर सुमारे १०० कॅमेऱ्यांची व्यवस्था केली आहे. तसेच डीजे आणि ध्वनियंत्रणांच्या आवाजाची पातळी तपासण्यासाठी कॅलिब्रेशन मीटर उपलब्ध करून देण्यात आले आहेत. त्यामुळे उर्वरित गणेशोत्सव काळात गर्दी, ध्वनिप्रदूषण आणि वाहतूक व्यवस्थेकडे पोलिसांचे लक्ष राहणार आहे.