Satara: ग्रामीण भागातील नागरिकांना अधिक प्रभावीपणे बँकिंग सेवा उपलब्ध करून देण्याची गरज असून मोठ्या ग्राहकांना कर्ज उपलब्ध होत असताना गरीब, गरजू तसेच नव्याने व्यवसाय सुरु करणाऱ्या उद्योजकांना वेळेवर कर्ज मिळण्यात अडचणी येत आहेत, असे मत जिल्हाधिकारी संतोष पाटील यांनी व्यक्त केले. गरीब व गरजू नागरिक, नवउद्योजक, व्यावसायिक, शेतकरी तसेच लघु व मध्यम उद्योजकांना वेळेवर व आवश्यक ते आर्थिक सहकार्य उपलब्ध करून देण्याचे आवाहन त्यांनी बँकांना केले.

बँक ऑफ महाराष्ट्रच्या वर्धापनदिनानिमित्त येथील बँकेच्या नूतन इमारतीचे उद्घाटन जिल्हाधिकारी संतोष पाटील यांच्या हस्ते उत्साहात झाले.त्यावेळी ते बोलत होते. या नवीन इमारतीमध्ये बँकेचे पोवई नाका शाखा कार्यालय व अंचल (विभागीय) कार्यालय कार्यरत करण्यात आले आहे. यावेळी बँकेचे ग्राहक, अधिकारी व कर्मचारी उपस्थित होते.

बँक ऑफ महाराष्ट्रच्या वर्धापनदिनानिमित्त अधिकारी, कर्मचारी व ग्राहकांना शुभेच्छा देऊन जिल्हाधिकारी संतोष पाटील यांनी बँकेच्या कार्याचे कौतुक केले. आवश्यक ते आर्थिक सहकार्य उपलब्ध करुन देण्याचे आवाहन त्यांनी बँकांना केले. जिल्ह्यातील उद्योग, व्यवसाय व कृषी क्षेत्राला वेळेवर बँकिंग सेवा व वित्तपुरवठा उपलब्ध झाल्यास रोजगारनिर्मितीला चालना मिळून जिल्ह्याच्या आर्थिक विकासास हातभार लागेल, असे जिल्हाधिकारी संतोष पाटील यांनी सांगितले.

बँकेचे उपअंचल प्रबंधक अमर मोरे यांनी प्रास्ताविक केले. जिल्ह्यातील बँकेच्या कामगिरीचा तसेच बँकेने आजपर्यंत केलेल्या प्रगतीचा आढावा त्यांनी मांडला. बँक ऑफ महाराष्ट्र ही केवळ बँकिंग सेवा देणारी संस्था नसून जिल्ह्याच्या आर्थिक व सामाजिक विकासात सक्रिय योगदान देणारी संस्था आहे, असे मोरे यांनी नमूद केले. नूतन कार्यालय व शाखेच्या माध्यमातून ग्राहकांना अधिक चांगली, जलद व गुणवत्तापूर्ण बँकिंग सेवा देण्याचा बँकेचा प्रयत्न राहील. तसेच ग्राहक सेवा, डिजिटल बँकिंग, कर्जवितरण, शासकीय योजना आणि आर्थिक समावेशन या क्षेत्रांत अधिक प्रभावीपणे कार्य करण्याचा संकल्प त्यांनी व्यक्त केला. नूतन कार्यालयाच्या माध्यमातून ग्राहकांना अधिक चांगल्या सुविधा देण्याचा तसेच आधुनिक तंत्रज्ञानाचा प्रभावी वापर करून बँकिंग सेवा अधिक गतिमान करण्याचा संकल्प अंचल प्रबंधक जोशी यांनी व्यक्त केला. शाखाधिकाऱ्यानी स्थानिक पातळीवर खातेदारांच्या समस्या समजून घेऊन त्या सोडविण्याच्या सूचना त्यांनी दिल्या. नितीराज साबळे यांनी सूत्रसंचालन केले व जिल्हा अग्रणी व्यवस्थापक नितिन तळपे यांनी सूत्रसंचालन केले.