प्रभात वृत्तसेवा पुणे – आगामी पुणे आणि पिंपरी- चिंचवड महापालिका निवडणुकांसाठी राज्य निवडणूक आयोगाच्या सूचनेनुसार विभागीय आयुक्तांनी निवडणूक निर्णय अधिकारी आणि सहायक निवडणूक निर्णय अधिकाऱ्यांची नियुक्ती केली आहे. त्यानुसार पुणे महापालिकेसाठी 15 क्षेत्रीय कार्यालयांसाठी 15 निवडणूक निर्णय अधिकारी आणि 15 सहायक निवडणूक निर्णय अधिकाऱ्यांच्या नियुक्तीचे आदेश दिले आहेत. पुणे विभागीय आयुक्त डॉ. चंद्रकांत पुलकुंडवार यांनी हे आदेश जारी केले आहेत. महसूल विभागातील उपजिल्हाधिकारी, तहसीलदार आणि नायब तहसीलदार दर्जाच्या अधिकाऱ्यांवर ही प्रमुख जबाबदारी सोपविण्यात आली आहे. महसूल विभागाचे अधिकारी उपलब्ध नसलेल्या ठिकाणी इतर विभागाच्या अधिकाऱ्यांचीही नियुक्ती करण्यात आली आहे. राज्य निवडणूक आयोगाने वेळोवेळी केलेल्या मागणीनुसार, विभागीय आयुक्तांनी आवश्यक अधिकारी उपलब्ध करून दिले आहेत. या अधिकाऱ्यांना त्यांना नेमून दिलेल्या महापालिका कार्यक्षेत्रात तात्काळ हजर राहण्याचेही आदेश विभागीय आयुक्तांनी दिले आहेत. नियुक्त केलेल्या अधिकाऱ्यांना संबंधित महापालिकेचे कार्यक्षेत्र नेमून दिले आहे. संबंधित महापालिका आयुक्त त्यांच्या कार्यक्षेत्रातील निवडणूक निर्णय अधिकारी व सहाय्यक निवडणूक निर्णय अधिकाऱ्यांचे नियुक्ती आदेश स्वतंत्रपणे जारी करणार आहे.
