Kolhapur | Devendra Fadnavis । Election News – कोल्हापूर जिल्ह्यातील १० नगरपरिषदा आणि ३ नगरपंचायतींच्या आगामी निवडणुकांसाठी भाजपने पक्ष कार्यालयात एकदिवसीय मॅरेथॉन बैठकीत ६ नगरपरिषदा आणि नगरपंचायतींसाठी नगराध्यक्षपदाच्या उमेदवार उभे करण्याचा निर्णय घेतला आहे. यामध्ये आजरा नगरपंचायत, चंदगड, शिरोळ, हुपरी, कुरुंदवाड आणि पेठवडगाव या नगरपरिषदा स्वबळावर लढवण्याचा निर्णय घेण्यात आला आहे. पक्षाच्या या धोरणात्मक निर्णयामुळे कोल्हापुरातील राजकीय समीकरणे मोठ्या प्रमाणात बदलणार आहेत. उच्च व तंत्र शिक्षणमंत्री चंद्रकांत पाटील, खासदार धनंजय महाडिक, आमदार अमल महाडिक, राहुल आवाडे, अशोक माने यांसह प्रदेश पातळीवरील मुख्य पदाधिकारी या बैठकीत उपस्थित होते. त्यांनी जिल्ह्यातील प्रत्येक इच्छुक उमेदवारांसोबत दुपारी १ ते संध्याकाळी ६ वाजेपर्यंत मॅरेथॉन मुलाखती घेतल्या आणि पक्षाच्या इच्छुक उमेदवारांची यादीही अपडेट केली. भाजपच्या आगामी नगरपरिषदा निवडणुकांसाठी दक्षता घेऊन, प्रत्येक शहरातील उमेदवारांची निवड करताना स्थानिक स्तरावर पक्षाची मजबूत पकड राहावी, यासाठीही काय योजना असावी यावर चर्चा झाली. कागल येथे राष्ट्रवादी काँग्रेससोबत युती करायची असून, गडहिंग्लज येथे जनसुराज्य आणि जनता दलाच्या स्वाती कोरी यांच्या बरोबरीने युतीचा निर्णय झाल्याची माहिती आहे. पन्हाळा आणि मलकापूरसाठी जनसुराज्य पक्षाबरोबर अजूनही चर्चासत्र सुरु आहे. इतर नगरपरिषदा आणि नगरपंचायतीसाठी घटक पक्षांसोबत जागा वाटपाची चर्चा सुरु असल्याने लवकरच या भागातील निर्णायक भूमिका स्पष्ट होतील, असा अंदाज आहे. CM फडणवीस करणार उमेदवारांची घोषणा भाजपच्या अधिकृत इच्छुक उमेदवार तपासणीनंतर शुक्रवारपासून नगरपरिषदा आणि नगरपंचायती निवडणुकांसाठी आता उमेदवारी अर्ज भरण्याची प्रक्रिया सुरु झाली आहे. नगराध्यक्षपदाच्या उमेदवारांची अधिकृत घोषणा मुख्यमंत्री देवेंद्र फडणवीस १७ नोव्हेंबर रोजी करणार आहेत. यामुळे भाजपकडून लवकरच एक तगड्या उमेदवारांची यादी बाहेर येण्याची शक्यता आहे. यावेळी कोल्हापुरात भाजप मैदानात सज्ज झालेली असून राजकीय स्पर्धा चुरशीची बनेल, अशी अपेक्षा व्यक्त केली जात आहे.
