Eknath Shinde : उपमुख्यमंत्री एकनाथ शिंदे यांनी (Eknath Shinde) आज दिवसभर सातारा जिल्ह्यातील त्यांच्या मूळ दरे गावात दिवसभर विविध विकासकामे, आरोग्य सेवा आणि नागरिकांच्या समस्यांचा आढावा घेतला. दौऱ्याची सुरुवात जनता दरबाराने झाली. या जनता दरबारात जावळी तालुक्यासह परिसरातील नागरिकांनी रस्ते, पाणीपुरवठा, वीज, आरोग्य, महसूल तसेच इतर नागरी सुविधांबाबतच्या तक्रारी आणि मागण्या मांडल्या.

उपमुख्यमंत्री शिंदे (Eknath Shinde) यांनी प्रत्येक नागरिकाचे म्हणणे शांतपणे ऐकून घेत संबंधित विभागाच्या अधिकाऱ्यांना तातडीने कार्यवाही करण्याचे निर्देश दिले. लोकांच्या अडचणी प्राधान्याने सोडवून त्यांना त्वरित दिलासा द्यावा, असे स्पष्ट निर्देश त्यांनी प्रशासनाला दिले. जनता दरबारानंतर त्यांनी दरे गावातील ग्रामदैवताचे दर्शन घेत राज्याच्या प्रगतीसह जनतेच्या सुख-समृद्धीसाठी प्रार्थना केली.

त्यानंतर उपमुख्यमंत्री शिंदे (Eknath Shinde) यांनी तापोळा येथील सुरू असलेल्या पुलाच्या कामाची प्रत्यक्ष पाहणी केली. पुलाच्या कामाचा दर्जा, प्रगती आणि उर्वरित कामांचा सविस्तर आढावा घेत त्यांनी संबंधित अभियंते व अधिकाऱ्यांशी चर्चा केली. हे काम कोणत्याही परिस्थितीत रखडता कामा नये तसेच दर्जेदार पद्धतीने आणि लवकरात लवकर पूर्ण करून नागरिकांसाठी खुले करावे, अशा स्पष्ट सूचना त्यांनी दिल्या.

यानंतर त्यांनी तापोळा प्राथमिक आरोग्य केंद्राला भेट देऊन तेथील आरोग्य सुविधांची पाहणी केली. रुग्णांना मिळणाऱ्या उपचारांची माहिती घेतली, डॉक्टर व कर्मचाऱ्यांशी संवाद साधला आणि औषधसाठ्याची तपासणी केली. विशेषतः औषधांच्या एक्सपायरी डेटची स्वतः पाहणी करून मुदतबाह्य औषधे वापरात नसावीत, औषधसाठ्याची नियमित तपासणी व्हावी आणि प्रत्येक रुग्णाला दर्जेदार आरोग्य सेवा उपलब्ध व्हावी, अशा सूचना आरोग्य विभागाला दिल्या.

आरोग्य केंद्रातील स्वच्छता, आवश्यक वैद्यकीय उपकरणे, औषधांचा पुरेसा साठा आणि रुग्णांना दिल्या जाणाऱ्या सेवांबाबतही त्यांनी अधिकाऱ्यांकडून माहिती घेतली. ग्रामीण भागातील नागरिकांना दर्जेदार आरोग्य सेवा उपलब्ध करून देणे ही शासनाची प्राथमिकता असल्याचे त्यांनी यावेळी नमूद केले.

दिवसभराच्या दौऱ्यात अनेक नागरिकांनी उपमुख्यमंत्री शिंदे यांची भेट घेऊन आपल्या समस्या मांडल्या. त्यांनी त्या सकारात्मकपणे ऐकून संबंधित अधिकाऱ्यांना आवश्यक निर्देश दिल्याने नागरिकांनी समाधान व्यक्त केले. दरेगाव व तापोळा परिसरातील दौरा पूर्ण झाल्यानंतर उपमुख्यमंत्री एकनाथ शिंदे (Eknath Shinde) पुढील शासकीय कामकाजासाठी मुंबईकडे रवाना झाले.