सोलापूर : सोलापूर महानगरपालिका सार्वत्रिक निवडणुकीत अर्ज माघारीच्या शेवटच्या दिवशी (२ जानेवारी) राजकीय दबाव, लॉबिंग आणि हिंसक गोंधळाचे नाट्य पाहायला मिळाले. प्रभाग क्रमांक ३ मध्ये अपक्ष उमेदवार बाबुराव जगताप यांच्या सुचक संतोष कोटा यांना माघार घेण्यासाठी भाजप कार्यकर्त्यांनी जबरदस्तीचा प्रयत्न केल्याचा आरोप झाला आहे. यामुळे निवडणूक अधिकारी कार्यालयाबाहेर मोठा आरडाओरडा, धक्काबुक्की आणि शाब्दिक चकमक झाली. दुसरीकडे, उमेदवारी न मिळाल्याच्या नाराजीतून भाजपच्या माजी नगरसेवक शंकर शिंदे यांच्या जोशी गल्लीतील संपर्क कार्यालयाची तोडफोड झाली. प्रभाग ३ (अ) मध्ये भाजपचे उमेदवार राजकुमार पाटील, शिंदे गटाचे सुरेश बिद्री आणि अपक्ष बाबुराव जगताप यांच्यात त्रिकोणी लढत रंगणार आहे. अपक्ष उमेदवार जगताप यांचा अर्ज बाद व्हावा आणि सुचक संतोष कोटा यांनी माघार घ्यावी यासाठी भाजप कार्यकर्त्यांनी प्रचंड प्रयत्न केले. सुरुवातीला मनधरणी केली, मात्र कोटा यांनी शेवटपर्यंत माघार न घेण्याची ठाम भूमिका घेतली. निवडणूक कार्यालयाबाहेर मोठा गोंधळ निर्माण झाला. भाजप कार्यकर्त्यांनी संतोष कोटांना जबरदस्तीने कार्यालयात नेण्याचा प्रयत्न केला, परंतु विरोधी कार्यकर्त्यांनी वेळ संपली असल्याचे सांगत अडवले. यानंतर आरडाओरडा आणि धक्काबुक्की झाली. परिस्थिती नियंत्रणाबाहेर गेल्याने पोलिसांनी हस्तक्षेप करत सर्वांना कार्यालयाबाहेर काढले. भाजप कार्यालयाची तोडफोड दुसरीकडे सोलापूरच्या जोशी गल्लीतील भाजपचे माजी नगरसेवक शंकर शिंदे यांचे संपर्क कार्यालय नाराज कार्यकर्त्यांनी फोडले. उमेदवारी न मिळाल्याच्या कारणावरून पक्षाच्या दोन गटांत वाद झाला. नाराज गटाने कार्यालयावर हल्ला करून तोडफोड केली. या घटनेमुळे परिसरात खळबळ उडाली. नागरिकांनी पोलिसांना माहिती दिल्यानंतर पोलिस घटनास्थळी दाखल झाले, गर्दी पांगवली आणि तोडफोड करणाऱ्या कार्यकर्त्यांना ताब्यात घेतले. अनर्थ टळला असला तरी पक्षांतर्गत नाराजीची तीव्रता दिसून आली.
