Baramati News – बारामती तालुक्यात महाराष्ट्र जीवन प्राधिकरणाअंतर्गत राबवण्यात येत असलेल्या जल जीवन मिशनच्या पाणीपुरवठा योजनांमध्ये गंभीर गैरव्यवहार, निकृष्ट दर्जाचे काम आणि प्रशासकीय नियमांची पायमल्ली झाल्याचा आरोप करण्यात आला आहे. या प्रकरणाची त्रयस्थ समितीमार्फत सखोल चौकशी करण्यात यावी, अशी लेखी तक्रार निंबोडी (ता. बारामती) चे सरपंच संतोष मोहन सोनवणे यांनी महाराष्ट्र जीवन प्राधिकरण (पुणे) चे कार्यकारी अभियंता नाडगौडा यांच्याकडे केली आहे.

तत्कालीन उपअभियंत्यांच्या कार्यकाळातील कामांच्या चौकशीची आग्रही मागणी या निवेदनाद्वारे करण्यात आली आहे. तक्रार निवेदनानुसार जैनवाडी, सावळ, कटफळ, पारवडी, निंबोडी आणि शिर्सुफळ या गावांमध्ये मंजूर झालेल्या, राबवलेल्या व कागदोपत्री अपूर्ण दाखवलेल्या योजनांच्या गुणवत्तेबाबत ग्रामस्थांमध्ये तीव्र असंतोष आहे.

चौकशीसाठी निवेदनातील प्रमुख मागण्या –
मंजूर कामांचे मूळ अंदाजपत्रक, प्रशासकीय मान्यता आणि प्रत्यक्षात जमिनीवर झालेल्या कामांची तुलनात्मक तपासणी करावी. निविदा प्रसिद्ध करण्यापासून ते कंत्राट वाटपापर्यंत नियमांचे पालन झाले आहे का, याची निष्पक्ष चौकशी व्हावी. कामे निकृष्ट असतानाही मोजमाप पुस्तिकेत चुकीच्या नोंदी करून बिले मंजूर केली गेली आहेत का? तसेच वापरलेल्या पाइपलाइन व साहित्याचे गुणवत्ता अहवाल तपासावेत.

चौकशी पथकाने प्रत्यक्ष सर्व गावांत जाऊन कामाचा दर्जा व योजना सुरू आहे की नाही, याची खातरजमा करावी. तालुक्यातील कोट्यवधींच्या पाणीपुरवठा योजनांमधील या गंभीर आरोपांनंतर आता जीवन प्राधिकरणाचे प्रशासन काय कारवाई करते, याकडे संपूर्ण बारामती तालुक्याचे लक्ष लागले आहे.