Omraje Nimbalkar vs Ranajagjitsinha Patil : राज्यभरात मोठ्या उत्साही वातावरणात गणेश विसर्जन मिरवणुका पार पडल्या. आपल्या लाडक्या बाप्पाला निरोप देताना गणेशभक्त भावूक झाल्याचं पाहायला मिळालं. मात्र, धाराशिवमध्ये गणेश विसर्जनाच्या मिरवणुकीत राजकीय वातावरण चांगलेच तापल्याचं एका घटनेवरून पाहायला मिळालं आहे. 

शिवसेना ठाकरे गटाचे खासदार ओमराजे निंबाळकर आणि भाजप आमदार राणाजगजितसिंह पाटील यांचे पित्र मल्हार पाटील हे दोघेही मिरवणुकीच्यादरम्यान आमने सामने आले. यानंतर जे काही घडलं त्याची जोरदार चर्चा राजकीय वर्तुळात होत आहे. या घटनेमुळे आता स्थानिक स्वराज्य संस्थांच्या निवडणुकीची रंगत वाढणार असल्याचं दिसत आहे. 

नेमकं काय घडलं?

धाराशिवमध्ये गणेश विसर्जन मिरवणूक मोठ्या उत्साहात पार पडली. पण यावेळी राजकीय वर्चस्वाची झलक पाहायला मिळाली. भाजपचे युवा नेते मल्हार पाटील हे आपल्या समर्थकांसह मिरवणुकीत सहभागी झाले होते. मिरवणुकीत रंगत आली होती. तर दुसरीकडे खासदार ओमराजे निंबाळकर हेही मिरवणुकीत सहभागी झाले होते. हे दोघेही एका मार्गावर एकत्र आले. 

यावेळी मल्हार पाटील यांना त्यांच्या समर्थकांनी गराड्यात घेत ओमराजे निंबाळकर यांना दंड थोपटून आव्हान दिलं. त्यानंतर एक गाण वाजलं. “नादी नको लागू माझ्या, तुला चांगलाच रडविन… ढोलकीला बांधून तुला बदाबदा बडविन…” या गाण्यावर मल्हार पाटील यांचे रील्स सोशल मीडियावर पोस्ट केल्याने ती क्लिप मोठ्या प्रमाणावर व्हायरल झाले आहेत. यावनंतर ओमराजे यांनी दिलेल्या संयमित कृतीची जोरदार चर्चा होत आहे. 

संकेत देणारी घटना 

हे गाणं वाजायला सुरूवात झाल्यानंतर ओमराजे राजे निंबाळकर यांनी भाजप कार्यकर्त्यांकडे बघून केलेलं स्मित हास्य या व्हायरल झालेल्या रीलमध्ये लक्ष वेधून घेत आहे. त्यांच्या संयमित प्रतिसादाची चर्चा केली जात आहे. आगामी काळात होऊ घातलेल्या स्थानिक स्वराज्य संस्थांच्या निवडणुका या पार्श्वभूमीवर ही घटना भाजप आणि शिवसेना यांच्यातील संघर्ष संकेत देणारी ठरत आहे.

हेही वाचा : Rohit Pawar : ‘देवाभाऊ’ म्हणत कोट्यावधींच्या निनामी जाहिराती नेमक्या कुणी दिल्या? रोहित पवारांचा मोठा दावा; म्हणाले “भाजपने नाहीतर…”