Sharad Pawar – ‘भविष्यात दोन्ही राष्ट्रवादी एकत्र आल्यास आश्चर्य वाटणार नाही’, असे राष्‍ट्रवादी कॉंग्रेस शरदचंद्र पवार पक्षाचे प्रमुख शरद पवार यांनी म्हटले आहे. तसेच हे राष्ट्रवादीच्या नव्या पिढीतील नेतृत्वाने ठरवावे. मी आता त्या निर्णय प्रक्रियेतून काहीसा बाजूला झालोय…आमची मंडळी विविध पक्षात विभागली असली तरी विचाराने एकत्र आहेत.

उपमुख्यमंत्री अजित पवार यांनी जुलै 2023 मध्ये राष्‍ट्रवादी कॉंग्रेसचे प्रमुख शरद पवारांच्या भूमिकेशी फारकत घेऊन भाजपसोबत जाण्याचा निर्णय घेतला. त्यानंतर मुळ राष्ट्रवादी काँग्रेस पक्ष कोणाचा यावरुन दोन्ही नेते न्यायालयातही गेले आहेत.

लोकसभेची आणि विधानसभेची निवडणूक देखील दोन्ही पक्षांनी एकमेकांच्या विरोधात लढली होती. मात्र, एका कार्यक्रमात शरद पवार यांनी केलेल्‍या वक्तव्याने राज्‍यातील राजकारणाला पुन्‍हा नवीन वळण मिळणार असल्‍याचे दिसून येत आहे.

शरद पवार म्हणाले, संसदेत विरोधी बाकांवर बसावे की नाही? हा निर्णय सुप्रियाने घ्यावा. सुप्रिया सुळेंचे काय? या प्रश्नावर शरद पवारांनी हे उत्तर दिले आहे. पक्षात दोन प्रवाह आहेत, एकाला वाटते अजितसोबत जावे. दुसरा प्रवाह भाजपपासून दूर राहावे या मताचा आहे, असेही त्‍यांनी स्पष्ट केले.

तसेच आमचे दिल्लीतील खासदारही एकाच विचाराने बांधले गेलेले आहेत. मात्र, राज्यातील आमच्या काही आमदारांना असे वाटते की मतदारसंघातील विकासकामं करून घेण्यासाठी अजित पवारांसोबत गेले पाहिजे, पण याबाबतचा निर्णय हा मी देणार नाही, त्यांनी तो निर्णय एकत्र बसून घ्यावा.

एकत्र येण्यासंदर्भात सुप्रिया आणि अजितने बसून ठरवावे. पक्ष उभा करताना आज बाजूला गेलेले सगळे एकत्र होते त्यांच्या सगळ्यांची विचारधारा एकच आहे. त्यामुळे भविष्यात जर हे सगळे एकत्र आले तर मला आश्चर्य वाटणार नाही. मी निर्णय प्रक्रियेपासून खूप लांब आहे. पक्षात भाकरी फिरवण्याचा निर्णय हा जयंत पाटलांनी घ्यावा, असेही शरद पवारांनी स्पष्ट केले.

“मनोमिलन लवकर व्‍हावे” – छगन भुजबळ

शरद पवारांनी दोन्ही राष्ट्रवादी एकत्र येण्याबाबत आशेचा किरण दाखवला आहे. त्यांच्या अनुभवाचा फायदा नक्कीच होईल. हे मनोमिलन लवकरात लवकर व्हावे, अशीच इच्छा मी व्यक्त करतो.

दोन्ही राष्ट्रवादी काँग्रेस एकत्र येत असतील तर मी मध्यस्थीसाठी तयार आहे, पण अजित पवार हे पवारसाहेबांच्या घरातच वाढलेत, त्यामुळे त्यांच्या मनोमिलनासाठी मध्यस्थाची गरज आहे, असे वाटत नाही, अशी प्रतिक्रिया अजित पवारांच्या राष्ट्रवादीचे नेते छगन भुजबळ यांनी दिली.