US-Israel-Iran War News – इराणसोबत युद्ध सुरू करणारे अमेरिकेचे राष्ट्राध्यक्ष डोनाल्ड ट्रम्प यांच्या लोकप्रियतेत मोठी घसरण झाली आहे. एका ताज्या सर्वेक्षणानुसार, केवळ ३६ टक्के अमेरिकन नागरिक त्यांच्या कामगिरीवर समाधानी असून त्यांच्या दुसऱ्या कार्यकाळातील आतापर्यंतची ही सगळ्यांत मोठी घसरण आहे. गेल्या आठवड्यात करण्यात आलेल्या सर्वेक्षणात ट्रम्प यांची लोकप्रियता ४० टक्के होती, जी या आता ३६ टक्क्यांपर्यंत घसरली आहे. याचा अर्थ, केवळ एका आठवड्यात ट्रम्प यांच्या लोकप्रियतेत ४ टक्क्यांची घट झाली आहे. अमेरिकेने इराणवर केलेले हल्ले आणि त्यामुळे तेलाच्या किमतीत झालेली मोठी वाढ यामुळे ट्रम्प यांच्या समर्थकांमध्ये लक्षणीय घट झाली आहे. सर्वेक्षण केलेल्यांपैकी ६२ टक्के लोकांना ट्रम्प यांची कामगिरी नापसंत आहे. केवळ २५ टक्के लोकांनी ट्रम्प यांच्या कार्यपद्धतीवर विश्वास व्यक्त केला. ट्रम्प यांनी २०२४ ची निवडणूक प्रामुख्याने महागाई आणि साध्या जीवनशैलीच्या आश्वासनांच्या मुद्द्यावर जिंकली होती. आता हेच मुद्दे त्यांच्या विरोधात एक महत्त्वपूर्ण घटक ठरत आहेत. आर्थिक व्यवस्थापनाबाबतही ट्रम्प यांच्या लोकप्रियतेत मोठी घसरण झाली आहे. केवळ २९ टक्के लोक त्यांच्या आर्थिक व्यवस्थापनाला योग्य मानत आहेत. लोकप्रियतेच्या अनुशंगाने बोलायचे झाल्यास ट्रम्प यांच्या दोन्ही कार्यकाळांमधील ही सर्वात कमी टक्केवारी आहे. आर्थिक मुद्द्यांवर त्यांची लोकप्रियता सध्या माजी राष्ट्राध्यक्ष जो बायडेन यांच्यापेक्षाही वाईट आहे. ६१ टक्के अमेरिकन नागरिक इराण युद्धाच्या विरोधात : इराण युद्धामुळे पेट्रोल आणि इतर इंधनाच्या किमतींमध्ये मोठी वाढ झाली असून, त्याचा परिणाम सामान्य अमेरिकन कुटुंबांवर होत आहे. या सर्वेक्षणात असेही आढळून आले की, केवळ ३५ टक्के लोकांनी इराणवरील हल्ल्यांना पाठिंबा दिला, तर ६१ टक्के लोकांनी त्याला विरोध केला. ट्रम्प यांच्या दुसऱ्या कार्यकाळाच्या सुरुवातीला त्यांची लोकप्रियता ४७ टक्क्यांपर्यंत पोहोचली होती, परंतु इराण संघर्ष आणि वाढत्या महागाईमुळे त्यांच्या लोकप्रियतेत मोठी घट झाली आहे. राजकीय विश्लेषकांच्या मते, जर तेलाच्या किमती आणखी वाढल्या आणि युद्ध लांबले, तर ट्रम्प यांच्या समस्या आणखी वाढू शकतात. ही घसरण ट्रम्प प्रशासनासाठी एक इशारा आहे. अर्थव्यवस्था आणि महागाईच्या समस्यांवर तोडगा काढण्याच्या आश्वासनांवर २०२४ मध्ये सत्तेवर परतलेले ट्रम्प आता याच आघाडीवर सर्वात असुरक्षित दिसत आहेत.
