न्यूयॉर्क – भारत आणि पाकिस्तानमधील संघर्ष थांबवल्याबद्दल आपल्याला शांततेचा नोबेल पुरस्कार मिळणार नाही, असे अमेरिकेचे अध्यक्ष डोनाल्ड ट्रम्प यांनी म्हटले आहे. भारत आणि पाकिस्तानमध्ये युद्धबंदी घडवून आणल्याबद्दल ट्रम्प यांना शांततेचा नोबेल पुरस्कार मिळावा, अशी शिफारस करण्यात येणार असल्याचे पाक सरकारने जाहीर केल्यानंतर ट्रम्प यांनी ही प्रतिक्रिया दिली आहे.

अमेरिकेचे परराष्ट्र मंत्री मार्को रुबिओ यांच्याबरोबर मिळून आपण कॉंगो आणि रवांडामधील युद्ध थांबवल्याची माहितीही ट्रम्प यांनी आपल्या सोशल मीडियावरच्या पोस्टमध्ये दिली आहे. इतर अन्य युद्धांप्रमाणे या युद्धातही मोठा रक्तपात होत होता. गेल्या अनेक दशकांपासून हे युद्ध सुरू होते.

रवांडा आणि कॉंगोमधील प्रतिनिधी सोमवारी वॉशिंग्टनमध्ये येणार असून युद्धबंदीच्या कागदपत्रांवर स्वाक्षऱ्या केल्या जाणार आहेत. हा दिवस आफ्रिकेसाठी पर्यायाने सर्व जगासाठी खूप चांगला दिवस असणार आहे, असेही ट्रम्प यांनी आपल्या पोस्टमध्ये म्हटले आहे.

मात्र या प्रयत्नांसाठी आपल्याला शांततेचा नोबेल पुरस्कार मिळू शकणार नाही. भारत-पाकिस्तान दरम्यानचे युद्ध किंवा सर्बिया आणि कोसोवोमधील युद्ध थांबवण्याबद्दलही आपल्याला शांततेचा नोबेल पुरस्कार मिळू शकणार नाही. असे ट्रम्प यांनी म्हटले आहे.
मध्यपूर्वेत शांततेसाठी अब्राहम करार, रशिया-युक्रेन, इस्रायल-इराणमधील मधील मध्यस्थीसाठीही आपल्याला शांततेचा नोबेल पुरस्कार मिळू शकणार नाही, असे ट्रम्प म्हणाले.

इजिप्त-इथिओपियामध्येही शांततेसाठी प्रयत्नांचा दावा…
अमेरिकेच्या अर्थसहाय्याच्या आधारे इथिओपियामध्ये मोठे धरण बांधले जाते आहे. मात्र यामुळे नाईल नदीचे पाणी अडवले जात असल्याने इजिप्त आणि इथिओपियात संघर्ष सुरू झाला आहे.

धरणाच्या कामासाठी अमेरिकेने अर्थसहाय्य करणे हा मूर्खपणा होता. पण इजिप्त आणि इतिओपियामध्ये शांतता प्रस्थापित व्हावी, यासाठीही आपण प्रयत्नशील आहोत. पण त्यासाठीही आपल्याला नोबेल पुरस्कार मिळणार नाही, असे ट्रम्प म्हणाले.