Swargate Case |  पुण्यातील स्वारगेट बसस्थानकात शिवशाही बसमध्ये एका २६ वर्षीय तरुणीवर मंगळवारी (ता. 25) बलात्कार झाल्याची धक्कादायक घटना घडली होती. या घटनेनंतर सर्व स्तरातून घटनेच्या संतप्त प्रतिक्रिया उमटत होत्या. या प्रकरणातील आरोपी दत्तात्रय गाडे (वय ३६) याला पोलिसांनी गुणाट गावातून अटक केली आहे. त्याला शिवाजीनगर जिल्हा सत्र न्यायालयाने १२ मार्चपर्यंत पोलिस कोठडी सुनावली आहे. मात्र आरोपी दत्ता गाडे याने स्वत:ला निर्दोष सांगत अनेक दावे केले होते, मात्र त्याचे सर्व दावे खोटे ठरले आहेत.

पीडित तरूणीची नराधमाकडे विनवणी 

स्वारगेट शिवशाही बलात्कार प्रकरणात पीडित तरुणीचा जबाब पोलिसांनी नोंदवला. बलात्कारानंतर जिवे मारू नये म्हणून तरुणीने आरोपी दत्ता गाडेकडे विनवणी केली. दादा, तुला काय करायचे ते कर. पण मला जिवे मारू नको, अशी विनवणी पीडित तरूणीने आरोपी दत्ता गाडे याच्याकडे केली होती. आरोपी दत्ता गाडेने शिवशाही बसमध्ये तरूणीला गळा दाबून जिवे मारण्याची धमकी दिली होती. पीडिता घाबरली आहे, ती कोणताही प्रतिकार करत नसल्याचे लक्षात येताच नराधम दत्ता गाडे याने शिवशाही बसमध्ये दुसऱ्यांदा अत्याचार केल्याचे तपासात समोर आले.

गाडेच्या बँक खात्यात फक्त 249 रुपये शिल्लक

आरोपी दत्ता गाडेने पीडित तरुणीवर कुठलीही बळजबरी केली नाही. तिनेच मला बोलावले आणि आम्ही बसमध्ये गेलो. तिने माझ्याकडून साडेसात हजार रुपये घेतले, असा दावा केला होता. एवढंच नव्हे तर त्या ठिकाणी तरुणीचा एक एजंटही उपस्थित होता. पिडीत तरुणीवर बलात्कार झालाच नाही असा दावा आरोपी दत्ता गाडे याने केला होता. मात्र दत्ताने ज्या तरूणीला साडेसात हजार रुपये असा दावा केला, त्याच दत्ता गाडेच्या बँक खात्याची तपासणी करण्यात आली. तेव्हा त्याच्या खात्यात फक्त 249 रुपये शिल्लक असल्याचे पोलिसांच्या तपासात उघड झाले आहे.

दोन वर्षांचे सीडीआर डिटेल्स तपासले 

याशिवाय आपण पीडित तरुणीला महिनाभरापासून ओळखत होतो असा दावा दत्ता गाडेने वकिलांमार्फत केला होता. त्यामुळे या दोघांच्या फोन कॉलची चौकशी व्हावी, अशी मागणी दत्तात्रय गाडे याच्या वकिलांनी केली होती. त्यानुसार पुणे पोलिसांनी दत्तात्रय गाडे याला अटक केल्यानंतर त्याच्या आणि पीडितेच्या मोबाईलचे दोन वर्षांचे सीडीआर डिटेल्स तपासले आहेत. मात्र त्यामध्ये कुठेही संबंधित आरोपी आणि पीडिता हे एकमेकांच्या संपर्कात असल्याचे दिसून आले नाही. त्यामुळे दत्ता गाडेचा आणखी एक खोटारडेपणा उघड झाला.

काय आहे नेमकं प्रकरण?

पुण्यात मागील आठवड्यात मंगळवारी पहाटेच्या सुमारास एका तरुणीवर बालात्कार करण्यात आला. स्वारगेट स्थानकात उभ्या असलेल्या शिवशाही बसमध्ये हा धक्कादायक प्रकार घडला. घटनेनंतर या प्रकरणातील आरोपी दत्ता गाडे फरार झाला होता. अखेर गुणाट गावात घुसून पोलिसांनी आरोपीच्या मुसक्या आवळल्या.

हेही वाचा : 

ट्रम्प यांच्यासोबतच्या वादानंतर झेलेन्स्की युक्रेनचे राष्ट्राध्यक्षपद सोडणार का? त्यांच्यासमोर कोणते पर्याय आहेत?