Digvijay Singh : मध्य प्रदेशात मतदानाला आठवड्यापेक्षाही कमी कालावधी शिल्लक आहे. सर्वच पक्षांचा प्रचार आणखी तीव्र होताना दिसून येत आहे. स्टार प्रचारक सातत्याने सभा घेत आहेत. दरम्यान, गुना येथील सभेत मध्य प्रदेशचे माजी मुख्यमंत्री आणि काँग्रेस नेते दिग्विजय सिंह यांनी केंद्रीय मंत्री आणि भाजप नेते ज्योतिरादित्य सिंधिया यांची त्यांच्या बालेकिल्ल्यात खिल्ली उडवली.

यावेळी सभेत दिग्विजय सिंह म्हणाले, “सिंधिया घराण्यातील असा राजा काँग्रेसचा असा विश्वासघात करेल, अशी मला अपेक्षा नव्हती. काँग्रेसने त्यांना काय दिले नाही? सर्वप्रथम त्यांनी ज्येष्ठ महाराज माधवराव सिंधिया यांना गुना येथून खासदार केले. इथून पुन्हा इंदिरा गांधी आणि राजीव गांधींनी त्यांना मंत्री बनवून आदर दिला. केंद्रीय मंत्री ज्योतिरादित्य सिंधिया यांनी काँग्रेसमध्ये प्रवेश केला आणि त्यांना दोनदा खासदार आणि नंतर मंत्री केले. मग त्यांनी काँग्रेस सोडण्याचे कारण काय? असा सवाल यावेळी उपस्थित केला.

माजी मुख्यमंत्री दिग्विजय सिंह यांनी गुना जिल्ह्यातील बामोरी विधानसभा मतदारसंघातील निवडणूक प्रचारादरम्यान भाजप आणि शिवराज सिंह चौहान यांच्यावरही निशाणा साधला आणि शिवराज सिंह यांचे मंत्री 100 रुपयांच्या बजेटमधून 40 रुपये कमिशन घेत असल्याचा आरोप केला. सरपंचाला अडचणींवर मात करून काम मिळवून देण्यासाठी लाच द्यावी लागते.

ते म्हणाले की, ज्योतिरादित्य सिंधिया यांच्या शिफारशीवरून महेंद्रसिंग सिसोदिया यांना काँग्रेस सरकारमध्ये मंत्री करण्यात आले होते, मात्र त्याच मंत्र्याने काही अज्ञात कारणाने सरकार पाडले. तसेच भाजप तरुणांचे भविष्य उद्ध्वस्त करत आहे. ज्यांना नोकऱ्या मिळत आहेत, त्यांच्याकडून योग्य प्रक्रिया पाळली जात नाही. यावेळी मध्य प्रदेश विधानसभा निवडणुकीत भाजप आणि काँग्रेसमध्ये थेट लढत होत असून ज्योतिरादित्य सिंधिया यांचीही कसोटी आहे. काँग्रेस सोडून भाजपमध्ये प्रवेश केल्यानंतर ही पहिलीच विधानसभा निवडणूक आहे.