Digital Arrest – डिजिटल ॲरेस्टची धमकी देऊन सायबर चोरट्यांनी एका ७० वर्षीय वकील महिलेची ७० लाखांची फसवणूक केली आहे. वकील महिलेने शिवाजीनगरच्या सायबर पोलीस ठाण्यात दिलेल्या फिर्यादीनुसार, तक्रारदार पिसोळी रस्त्यावर राहायला आहेत. सायबर चोरट्यांनी ५ ऑगस्ट रोजी त्यांच्या मोबाइलवर संपर्क साधून राष्ट्रीयकृत बँकेतून बोलत असल्याची बतावणी केली.

बँक खात्याचा वापर काळ्या पैशांच्या व्यवहारात झाल्याने आपणास डिजिटल ॲरेस्ट होणार असल्याची धमकी दिली. ही कारवाई टाळण्यासाठी तातडीने पैसे द्यावे लागतील, असे सांगितले. त्यामुळे तक्रारदारांनी चोरट्यांच्या खात्यात तीन दिवसांत वेळोवेळी ७० लाख जमा केले. चौकशीनंतर फसवणुकीचा प्रकार उघडकीस आला. पोलीस निरीक्षक संगीता देवकाते तपास करत आहेत.

डाॅक्टरांची फसवणूक
सायबर चोरट्यांनी एका डाॅक्टरांची सात लाख २३ हजारांची फसवणूक केली आहे. लक्ष्मीनगर पोलीस ठाण्यातील फिर्यादीनुसार तक्रारदार ४६ वर्षीय डाॅक्टर येरवड्यातील महावीर सोसायटीत राहायला आहेत. त्यांचे ऑनलाइन खरेदी व्यवहारांचे ॲप बँक खात्याला जोडले आहे. चोरट्यांनी मोबाइलचा तांत्रिक ताबा घेऊन खात्यातून सात लाख २३ हजार रुपये दुसऱ्या खात्यात जमा केले. पोलीस निरीक्षक नीलकंट जगताप तपास करत आहेत.