Crypto Fraud : जादा परतावा, बोनस कॉईन आणि अल्पावधीत दामदुप्पट ते पाचपट नफा मिळवून देण्याचे आमिष दाखवत क्रिप्टो कॉइनमध्ये गुंतवणूक करण्यास प्रवृत्त करून तब्बल 21 लाख 75 हजार 900 रुपयांची आर्थिक फसवणूक केल्याप्रकरणी सासवड पोलीस ठाण्यात पाच जणांविरुद्ध विविध गंभीर कलमांन्वये गुन्हा दाखल केला आहे. या प्रकरणामुळे परिसरात मोठी खळबळ उडाली असून,

क्रिप्टो गुंतवणुकीच्या नावाखाली होणाऱ्या फसवणुकीचा आणखी एक प्रकार समोर आला आहे. याबाबत हर्षदा अमोल मुऱ्हे (वय 36, रा. शिरवळ, ता. खंडाळा, जि. सातारा) यांनी सासवड पोलीस ठाण्यात फिर्याद दाखल केली आहे. या प्रकरणातील आरोपींमध्ये शुभम जगताप, संतोष कटके, संकेत इनामके, अनिता प्रकाश जगताप (सर्व रा. सासवड, ता. पुरंदर) तसेच कालिका ज्ञानेश्वर शिंदे (रा. मुंबई) यांचा समावेश आहे.

फिर्यादीनुसार, सप्टेंबर 2024 पासून आरोपींनी TRILLIONER कंपनीच्या TLC 2.0 प्री-लाँच क्रिप्टो कॉइन योजनेत गुंतवणूक केल्यास 40 टक्के बोनस कॉइन, दरमहा 4 ते 5 टक्के परतावा आणि भविष्यात दामदुप्पट ते पाचपट नफा मिळेल, असे आकर्षक आश्वासन दिले. सुरुवातीला काही रक्कम परत देऊन विश्वास संपादन करण्यात आला.

त्यानंतर फिर्यादी व त्यांच्या कुटुंबीयांकडून विविध टप्प्यांमध्ये आरटीजीएस आणि ऑनलाइन व्यवहाराद्वारे अनिता प्रकाश जगताप व कालिका ज्ञानेश्वर शिंदे यांच्या बँक खात्यावर एकूण 21 लाख 75 हजार 900 रुपये जमा करून घेण्यात आले. मात्र, काही कालावधीनंतर परतावा देणे बंद केले. मूळ रक्कम परत मागितल्यावर कंपनीचे मार्केट घसरले असून सध्या पैसे देता येणार नाहीत, अशी कारणे आरोपींकडून सांगण्यात आली.

इतर गुंतवणूकदारांनाही अशाच प्रकारे मोठ्या नफ्याचे आमिष दाखवून गुंतवणूक करण्यास प्रवृत्त केल्याचे फिर्यादीने नमूद केले आहे. या प्रकरणात आरोपींनी संगनमताने विश्वासघात करून आर्थिक अपहार व फसवणूक केल्याचे फिर्यादीत नमूद केले आहे. पोलीस निरीक्षक संतोष घोळवे पुढील तपास चालू आहे.

जिल्ह्यात कोटींच्या घरात व्याप्ती
जिल्ह्यात क्रिप्टो गुंतवणुकीचे आमिष दाखवून फसवणूक केल्याचे प्रकार यापूर्वी उघडकीस आले आहेत. या घटनेमुळे पुरंदर तालुक्यात लाखांच्या घरात रक्कम आहे. मात्र, जिल्ह्यात ही रक्कम कोटींवर असण्याची शक्यता वर्तविली जात आहे. जादा परताव्याच्या आमिषाने क्रिप्टो किंवा इतर गुंतवणूक योजनांमध्ये पैसे गुंतविण्यापूर्वी संबंधित कंपनीची कायदेशीरता, नोंदणी आणि व्यवहारांची खातरजमा करण्याची गरज पुन्हा एकदा अधोरेखित झाली आहे.