Shivraj Motegaonkar : देशभरात खळबळ उडवून देणाऱ्या NEET पेपरफुटी प्रकरणात लातूरमधील रेणुकाई करिअर सेंटर (RCC) चे संचालक शिवराज मोटेगावकर यांच्याविरोधात CBI च्या तपासातून धक्कादायक माहिती समोर आली आहे. मोटेगावकर यांनी त्यांच्या साथीदारांच्या मदतीने अत्यंत सुनियोजित पद्धतीने प्रश्नपत्रिका फोडण्याचे रॅकेट उभे केल्याचा संशय तपास यंत्रणांनी व्यक्त केला आहे. CBI च्या प्राथमिक तपासानुसार, मोटेगावकर यांनी त्यांच्या क्लासमध्ये कार्यरत असलेल्या पी. व्ही. कुलकर्णी आणि मनीषा मांढरे यांची NTAच्या प्रश्नपत्रिका तयार करणाऱ्या पॅनलवर नियुक्ती करून घेतली होती. कुलकर्णी यांच्याकडे केमिस्ट्री तर मांढरे यांच्याकडे बायॉलॉजी विषयाची जबाबदारी होती. या दोघांच्या माध्यमातून संबंधित विषयांच्या प्रश्नपत्रिका आधीच मिळवून त्या मोटेगावकरांपर्यंत पोहोचवल्या जात असल्याचा संशय आहे. तपास यंत्रणांच्या मते, या प्रश्नपत्रिकांच्या आधारे विद्यार्थ्यांचे गुण वाढवून RCC क्लासची प्रतिमा उंचावण्याचा प्रयत्न केला जात होता. अधिकाधिक विद्यार्थी आपल्या क्लासकडे आकर्षित व्हावेत, यासाठी हे संपूर्ण नेटवर्क कार्यरत असल्याचा संशय CBI ने व्यक्त केला आहे. दरम्यान, मोटेगावकर यांनी NTAच्या पॅनलवर कुलकर्णी आणि मांढरे या दोघांची नियुक्ती नेमकी कशी करून घेतली? त्यांचे NTAमधील कोणाशी संबंध होते क? तसेच या प्रकरणात आणखी कोणाचा सहभाग आहे का? याचाही तपास CBI कडून सुरू आहे. Shivraj Motegaonkar CBI ला तपासादरम्यान अनेक महत्त्वाच्या लिंक मिळत असल्याची माहिती समोर आली आहे. महाराष्ट्रात शुभम खैरनारला सर्वप्रथम अटक करण्यात आली. त्यानंतर धनंजय लोखंडे याला ताब्यात घेण्यात आले. त्यानंतर सीबीआय पुण्यात ब्यूटी पार्लरचा व्यवसाय करत असलेल्या मनीषा वाघामारेंपर्यंत पोहचली. त्यानंतर पी. व्ही कुलकर्णी आणि मनीषा वाघमारे यांच्यावर अटकेची कारवाई करण्यात आली. या दोघांच्या अटकेनंतर जे नाव समोर आलं त्यामुळे शिक्षण क्षेत्रात मोठी खबळबळ उडाली. ते नाव म्हणजे RCC चे संचालक शिवराज मोटेगावकर यांचं. मुलासाठी पेपर फोडला? सीबीआयच्या तपासात मोटेगावकर यांनी स्वतःच्या मुलालाही लीक झालेला पेपर दिल्याचा संशय व्यक्त केला जात आहे. त्यांचा मुलगाही बारावीमध्ये शिकत होता आणि त्याने NEET ची परीक्षा दिली होती. मुलाला वैद्यकीय प्रवेशासाठी जास्त गुण मिळावेत, या हेतूनेच पेपरफुटी करण्यात आली का, या दिशेनेही CBI तपास करत आहे. दरम्यान, CBI ने रविवारी लातूरमधून शिवराज मोटेगावकर यांना अटक केली होती. दिल्लीतील विशेष CBI न्यायालयाने सोमवारी मोटेगावकर यांना नऊ दिवसांची CBI कोठडी सुनावली आहे. संघटित टोळीचा सक्रिय सदस्य CBI ने न्यायालयात दावा केला की, मोटेगावकर हा प्रश्नपत्रिका फोडणे आणि ती विद्यार्थ्यांपर्यंत पोहोचवणाऱ्या संघटित टोळीचा सक्रिय सदस्य होता. RCC कोचिंग सेंटरच्या माध्यमातून प्रश्नपत्रिका आणि उत्तरपत्रिका विद्यार्थ्यांपर्यंत पोहोचवण्यात त्याची महत्त्वाची भूमिका होती. त्यांच्या मोबाईलमध्ये ३ मे रोजी झालेल्या NEET परीक्षेची कथित लीक झालेली प्रश्नपत्रिका आढळल्याचा दावाही तपास यंत्रणेने केला आहे. या सगळ्यात प्रश्नपत्रिका सर्वदूर पोहचविण्यासाठी महत्वाचे माध्यम टेलिग्राम असल्याचे तपासात पुढे आले आहे. हेही वाचा : US Iran War: ‘अमेरिकेनेच अंतिम मुदत ठरवली अन् स्वतःच पळ काढला”; इराणची खोचक टीका
