Dhruv Jurel smashed his maiden List A century : भारतीय संघ सध्या आंतरराष्ट्रीय क्रिकेटपासून काही काळ दूर असला, तरी देशांतर्गत क्रिकेटमध्ये भारतीय खेळाडूंचा जलवा कायम आहे. सध्या सुरू असलेल्या विजय हजारे ट्रॉफीमध्ये उत्तर प्रदेशकडून खेळताना युवा यष्टीरक्षक फलंदाज ध्रुव जुरेलने बडोद्याविरुद्ध जबरदस्त शतक झळकावून खळबळ उडवून दिली आहे. त्याच्या या खेळीमुळे आगामी न्यूझीलंड दौऱ्यासाठी त्याने आपली दावेदारी प्रबळ केली आहे. १०१ चेंडू अन् १६० धावा; ‘लिस्ट-ए’ कारकिर्दीतील पहिले शतक बडोद्याविरुद्धच्या सामन्यात तिसऱ्या क्रमांकावर फलंदाजीला आलेल्या ध्रुव जुरेलने सुरुवातीपासूनच आक्रमक पवित्रा घेतला. त्याने केवळ १०१ चेंडूंमध्ये १६० धावांची नाबाद खेळी केली. विशेष म्हणजे, ‘लिस्ट-ए’ क्रिकेटमधील (५० षटके) हे जुरेलचे पहिलेच शतक आहे. या खेळीत त्याने १५ चौकार आणि ८ षटकार ठोकले. जुरेलच्या या वादळी खेळीमुळे उत्तर प्रदेशने ५० षटकांत ३६९ धावांचा डोंगराएवढा स्कोअर उभा केला. जुरेल व्यतिरिक्त अभिषेक गोस्वामीने ५१ आणि रिंकू सिंगने ६७ चेंडूत ६३ धावांचे योगदान दिले. हेही वाचा – Smriti Mandhana : स्मृतीचा ‘विराट’ प्रताप! स्वतःचाच वर्ल्ड रेकॉर्ड मोडत रचला अभूतपूर्व इतिहास; जगातील पहिलीच खेळाडू वनडे पदार्पणाची प्रतीक्षा संपणार? ध्रुव जुरेलने आतापर्यंत भारतासाठी कसोटी आणि टी-२० फॉरमॅटमध्ये पदार्पण केले आहे, मात्र त्याला अजून एकही वनडे आंतरराष्ट्रीय सामना खेळता आलेला नाही. त्याने आतापर्यंत ९ कसोटी सामन्यात ४५९ धावा (१ शतक, १ अर्धशतक) केल्या आहेत. तसेच ४ टी-२० सामन्यात १२ धावा केल्या आहेत. ज्या पद्धतीने जुरेल सध्या धावा कुटत आहे, ते पाहता त्याला लवकरच वनडे संघात स्थान मिळण्याची दाट शक्यता आहे. न्यूझीलंड मालिकेसाठी संघ निवडीवर नजर – येत्या ११ तारखेपासून भारत आणि न्यूझीलंड यांच्यात तीन सामन्यांची वनडे मालिका खेळवली जाणार आहे. या मालिकेसाठी अद्याप भारतीय संघाची घोषणा झालेली नाही. बीसीसीआयची निवड समिती विजय हजारे ट्रॉफीमधील खेळाडूंच्या कामगिरीवर बारीक लक्ष ठेवून आहे. हेही वाचा – Sonam Yeshey : क्रिकेट जगतात खळबळ! २२ वर्षीय गोलंदाजाचा टी-२० आंतरराष्ट्रीयमध्ये वर्ल्ड रेकॉर्ड यष्टीरक्षक फलंदाज म्हणून सध्या इशान किशनचे नाव आघाडीवर असले, तरी जुरेलने १६० धावांची खेळी करून निवडकर्त्यांपुढे पेच निर्माण केला आहे. रिषभ पंत, इशान किशन आणि आता ध्रुव जुरेल यांच्यातील स्पर्धेमुळे कोणाची वर्णी लागते, हे पाहणे औत्सुक्याचे ठरेल.
