राजगुरूनगर : राजगुरूनगर सहकारी बँक लि.च्या अध्यक्ष व उपाध्यक्षपदाची निवडणूक येत्या मंगळवारी (दि. 25) होणार आहे. बँकेच्या मुख्य कार्यालयातील सभागृहात सकाळी 11 वाजता विशेष सभा आयोजित करण्यात आली असून, निवडणूक निर्णय अधिकारी तथा सहकारी संस्था सहाय्यक निबंधक सचिन देशमुख यांच्या उपस्थितीत ही निवड प्रक्रिया पार पडणार आहे.

पुणे जिल्ह्यातील सहकार क्षेत्रातील अग्रगण्य बँक म्हणून राजगुरूनगर सहकारी बँकेकडे पाहिले जाते. अध्यक्ष व उपाध्यक्षपदाच्या निवडणुकीसाठी सर्व संचालकांना विशेष सभेची नोटीस बजावण्यात आली आहे. निवडणूक कार्यक्रमानुसार सकाळी 11.15 ते 11.45 या वेळेत नामनिर्देशनपत्रांचे वाटप व स्वीकृती होईल. त्यानंतर 11.46 ते 12 या वेळेत नामनिर्देशनपत्रांची छाननी करण्यात येणार आहे. दुपारी 12.01 वाजता वैध नामनिर्देशनपत्रांची यादी प्रसिद्ध केली जाईल. त्यानंतर 12.02 ते 12.18 या वेळेत उमेदवारांना नामनिर्देशनपत्रे मागे घेता येतील. दुपारी 12.18 वाजता अंतिम उमेदवारांची यादी जाहीर करण्यात येणार आहे. आवश्यकता भासल्यास 12.20 ते 12.50 या वेळेत मतदान घेण्यात येईल. त्यानंतर 12.51 वाजता मतमोजणी सुरू करून निवडून आलेल्या पदाधिकार्‍यांचा निकाल तत्काळ सभेच्या ठिकाणी जाहीर केला जाणार आहे.

अध्यक्षपदासाठी थिगळे, उपाध्यक्षपदासाठी आहेर-मांजरे चर्चेत

राजगुरूनगर सहकारी बँकेच्या अध्यक्षपदासाठी ज्येष्ठ संचालक अरुण थिगळे यांच्या नावाची चर्चा सुरू आहे. तर उपाध्यक्षपदासाठी समीर आहेर व सचिन मांजरे यांच्या नावांची चर्चा असल्याची माहिती आहे. यापूर्वी बँकेच्या संचालक मंडळात एकमताने अध्यक्ष व उपाध्यक्षांची निवड होत आली आहे. यावेळीही संचालक मंडळात एकमताने पदाधिकार्‍यांची निवड होण्याची शक्यता असल्याचे सूत्रांकडून सांगण्यात येत आहे. त्यामुळे 25 ऑगस्टच्या निवडणुकीकडे सहकार क्षेत्राचे लक्ष लागले आहे.