Devendra Fadnavis : राज्‍यात बऱ्याच कॉर्पोरेट कंपन्यांमध्ये धर्मांतर आणि महिलांचा छळ करण्याची एक मोडस ऑपरेंडी चालल्याचे निदर्शनास (Devendra Fadnavis) आले आहे.

सद्य:स्थितीतील कायदे हे खासगी कार्यालये आणि रात्रीच्या शिफ्टमध्ये काम करणाऱ्या महिलांच्या आजच्या वाढत्या संख्येनुसार अपुरे पडत आहेत. त्यामुळे कायद्यात सुधारणा करण्यासाठी दोन्ही सभागृहांतील महिला सदस्यांची मिळून एक विशेष समिती तयार केली जाईल.

ही समिती सध्याच्या घटनांचा अभ्यास करून उपाययोजना सुचवेल, ज्यांची राज्य सरकार तातडीने अंमलबजावणी करेल, अशी माहिती आश्वासन देवेंद्र फडणवीस (Devendra Fadnavis) यांनी दिली. नाशिकच्या टीसीएस कंपनीतील धर्मांतर प्रकरण समोर आले होते. या प्रकरणात महिला कर्मचाऱ्यांचे लैंगिक शोषण, छळ आणि सक्तीचे धर्मांतर करण्यात आले होते. त्यामुळे मुद्दा आज विधान परिषद सभागृहात उपस्थित करत आमदार चित्रा वाघ यांनी आक्रमक भूमिका मांडली.

देवेंद्र फडणवीस (Devendra Fadnavis) म्‍हणाले, टीसीएस प्रकरणात एका धर्माच्या काही लोकांनी एकत्रित येऊन प्रेशर टाकून एका महिलेचे लैंगिक शोषण केले आणि धर्म परिवर्तन करण्याकरता तिच्यावर दबाव टाकला. त्यातला दुर्दैवाचा पाठ एवढाच होता की, त्या महिलेने आपल्या मॅनेजरकडे तक्रार केली आणि त्या मॅनेजरची ही जबाबदारी होती की, त्यांनी तत्काळ त्याच्यावर कारवाई करायला पाहिजे होती.

पण त्यांनी कारवाई केली नाही आणि म्हणूनच या केसमध्ये नऊ गुन्हे आपण दाखल केलेले आहेत आणि त्या मॅनेजरलाही त्याच्यात आरोपी केले आहे. मात्र, या संपूर्ण घटनेत टीसीएस या कंपनीचा कोणताही थेट सहभाग नाही. कंपनीने तपासात पूर्ण सहकार्य केले आहे आणि शासन सुचवेल त्या सर्व उपाययोजना लागू करण्याची तयारी दर्शवली आहे, अशी माहिती त्‍यांनी दिली.