Devdas Movie: सन २००२ मध्ये प्रदर्शित झालेला ‘देवदास’ (Devdas Movie ) हा चित्रपट आजही हिंदी चित्रपटसृष्टीतील क्लासिक मानला जातो. शाहरुख खान, माधुरी दीक्षित आणि ऐश्वर्या राय बच्चन यांच्या अभिनयामुळे या चित्रपटाने प्रेक्षकांच्या मनावर कायमचा ठसा उमटवला. विशेषतः ‘मार डाला’ हे गाणं आजही लोकांच्या ओठांवर आहे. मात्र पडद्यावर जितकं हे गाणं सुंदर दिसतं, तितकंच त्यामागचं वास्तव कष्टदायक होतं. ‘देवदास’मध्ये चंद्रमुखीची भूमिका साकारणाऱ्या माधुरी दीक्षित यांनी अलीकडेच या गाण्याच्या शूटिंगबद्दल एक खुलासा केला. त्यांनी सांगितलं की, ‘मार डाला’चं चित्रीकरण त्यांच्या करिअरमधील सर्वात कठीण अनुभवांपैकी एक होतं. या गाण्यात त्यांनी अतिशय जड आणि भव्य पोशाख परिधान केला होता. प्रसिद्ध डिझायनर अबू जानी आणि संदीप खोसला यांनी तयार केलेल्या अनारकली ड्रेसचं वजन तब्बल १० किलो होतं. हा पोशाख तयार करण्यासाठी जवळपास दोन महिने लागले होते. Shahrukh khan and Madhuri Dixit during the shooting of Devdas movie गाण्यातील एका दृश्यात माधुरी यांना त्यांच्या जड दुपट्ट्याचा टोक शाहरुख खान यांच्या चेहऱ्यावर अदांनी फेकायचा होता. मात्र त्या दुपट्ट्याच्या कडेला जड गोल मोती लावलेले होते. पहिल्यांदा हा शॉट देताना ते मोती शाहरुख यांच्या चेहऱ्यावर जोरात लागले. त्यामुळे त्यांना दुखापत झाली. तरीही शाहरुख यांनी व्यावसायिकता दाखवत शक्यतो एकाच टेकमध्ये सीन पूर्ण करण्याचा प्रयत्न केला, जेणेकरून पुन्हा पुन्हा दुखापत होऊ नये. फक्त शाहरुखच नाही, तर माधुरी यांनाही यात त्रास सहन करावा लागला. तेच जड मोती वारंवार त्यांच्या कपाळावर आपटत होते. त्यात सतत फिरण्याचे स्टेप्स आणि जड लहंगा सांभाळणं खूप अवघड होतं. अनेकदा त्या थांबल्या तरी त्यांचा जड पोशाख उशिरा थांबत असे, त्यामुळे तोल जाण्याचा धोका निर्माण होत होता. ‘मार डाला’ हे गाणं केवळ नृत्यनाट्य नसून एक दृश्यात्मक कलाकृती मानली जाते. त्याची भव्य मांडणी, प्रकाशयोजना आणि भावनिक सादरीकरण आजही प्रेक्षकांना भारावून टाकतं. पण या सौंदर्यामागे कलाकारांनी सहन केलेली वेदना आणि मेहनत दडलेली आहे. ‘देवदास’ (Devdas Movie) हा चित्रपट प्रदर्शित होऊन अनेक वर्षे झाली असली, तरी त्यातील गाणी आणि संवाद अजूनही तितकेच लोकप्रिय आहेत. विशेषतः ‘मार डाला’ हे गाणं आजही कार्यक्रमांमध्ये सादर केलं जातं. या गाण्यामागची ही वेदनादायक आठवण ऐकून चाहत्यांना कलाकारांच्या मेहनतीची जाणीव पुन्हा एकदा झाली आहे.